Panglawas sa Tarsier gibantayan sa DENR

CEBU, Philippines - Ang Department of Environment and Natural Resources (DENR-7)    higpit   mopatuman  og  balaod bahin sa paghupot og dinakpan nga  Tarsier (Tarsius syrichta) sulod sa Tarsier Conservation Area (TCA) sa Loboc,  Bohol. Matud pa ni DENR-7 Regional Executive Director Dr. Isabelo Montejo nga ang nag-unang gimbuhaton sa ilang departamento mao ang pagsiguro sa kaluwasan ug proteksyon sa mga Tarsier batok sa   mga  tawo  nga  makadakop  niini  apan dili kaantigo  moatiman  sa  panglawas  sa maong  hayop.

Matud  pa ni Montejo  nga  ang  800  matag adlaw  nga turista  nga mosuroy  sa Bohol nga may katibuk-ang 24 mil matag  buwan ug anhi mag-agi sa Sugbo una  moabot sa conservation area o  lugar  nga puy-anan sa  mga  tarsier, makapausab  kini  sa palibot sa maong  dapit  ug gumikan sa pagkadisturbo sa  pagpuyo sa mga tarsier, maapektahan usab ang  ilang  panglawas  nga malagmit  dali  ra  nga  dakpon  sa  mga  sakit.

Sumala pa ni Montejo nga ang tarsier  giisip  na  karon  nga  nahimutang sa dakong  hulga sumala  sa mga kadagkoan  sa  International Union on Conservation of Nature (IUCN) List of Threatend Species nga nagkinahanglan og igong proteksyon ug konserbasyon, matud  pa  ni  Montejo.

Ang TCA gilusad niadtong Hulyo 2011 nga gitambayayongan pagdumala sa  11 ka membro sa Bohol Tarsier Permittees Corporation (BTPC) ug DENR pinaagi sa Memorandum of Agreement (MOA) aron makab-ot ang tukmang  sistema  sa pagmintenar ug  pagprotiher   sa mga tarsier lakip na ang probisyon  bahin  sa pagsuporta sa industriya sa ecotourism  niini.

Matud pa ni Montejo nga ang naghupot nga  11 ka Wildlife Farm Permit (WFP) nag-atiman  karon  og 113 ka mga tarsier diin 80 niini, ang babaye samtang 33 usab ang lalaki nga nahimutang  sa 22 ka ektaryang conservation area.

Gipadayag ni Ray Toledo, usa sa mga nagdumala sa TCA nga ang matag tarsier sa maong pasilidad lawgan nila og 20 ngadto sa 30 ka timos (crickets) ug mga dagkong  wati matag adlaw.

Matud  pa ni Toledo nga ang labing tiguwang nga tarsier nagpangedaron  na og 16 anyos nga ginganlag "Lolo Jose" samtang ang labing bata nga tarsier nagpangedaron usab og siyam ka bulan. (Liezl M. Frasno-correspondent/WC) (BANAT NEWS)