Mi-dive sa kabatuhan naugbok patay

CEBU, Philippines - Naliki ang ulo ug namatay ang 29-anyos nga caretaker og beach resort human mitugpa ang ulo sa bato dihang mi-dive kini sa mabaw nga bahin sa dagat sa beach resort nga iyang gitrabahoan sa barangay Coro sa lungsod sa Dalaguete niadtong Sabado sa alas 6:18 sa buntag.

Ang patay nang nadangat sa tambalanan mao si Diory Gamboa Martinez, 29,  apan dunay kapuyo ug molupyo sa barangay Molobolo sa lungsod sa Boljoon ug stay-in worker sa usa ka beach resort sa maong lugar nga gipanag-iya ni Nellen Tambis.

Matud ni PO2 Godofredo Glepa sa Dalaguete Police Station dihang nahinabi sa Banat News paingon nga maligo ang biktima ug diretso og patong sa diving board ug mi-dive ngadto sa kabatuhan.

Nasuta nga wala kini makabantay nga hunas niadtong tungora ug mabaw ang dagat ug migimaw na ang mga bato hinungdan nga didto kini motugpa sa kabatuhan.

Ang mga kauban na niya maoy daling mitabang kaniya tungod sa kagrabe sa kadaot nga naangkon niini sa ulo apan pag-abot sa Cardinal Rosales Hospital sa lungsod  patay na kini. (Darrel A. Carumba/EIM) (BANAT NEWS)