‘Hilan’ ang lugar

MANILA, Philippines - Kapin kun kulang sa kwarenta na ka mga tawo ang nangamatay sa lugar diin mahitabo ang aksidente sa miaging gabii nga gikalambigitan sa Jegans Bus nga mikalas og pito ka tawo ug miangol usab sa 43 ka pasahero niini.

Nakalas sa maong aksidente mao sila si Jose Agrix Baraquil, 29; Thelma Sipalay, 24; Virgilo Canabano, 54; Cherry Ann Nillama, 16; Melinda Limbang, 48; ug Irineo Umba, 59.

Ang drayber sa maong bus mao si Allan Pastidio, 40, kinsa gitanggong na karon sa karsel sa Toledo Police Station ug gikatakdang pasakaan og kasong reckless imprudence resulting to multiple homicide and multiple physical injuries and damage to property.

Ang mga nangaangol padayong giatiman sa Vicente Sotto Memorial Medical Center nga gibisita usab ni Gob. Gwendolyn Garcia ug mga opisyales sa lalawigan. Samtang si Land Transportation and Franchising Regulatory Board-7 Director Ahmed Cuizon sa pakighinabi sa Banat News mibutyag nga kasamtangan usab nilang gipaubos sa suspension ang tulo ka bus sa Jegans Bus Liner nga adunay parehas og franchise case number.

Matud pa ni Cuizon sulod sa 30 ka adlaw ang maong suspensyon ug sulod ning mga adlawa ipaubos sa road safety seminars ang mga drayber niini ug ila usab nga sutaon ang road worthiness sa ilang mga sakyanan.

Hilan nga lugar

Usa sa mga residente sa maong lugar nga si Rosalie Bacalso, 32, mibutyag nga gibanabana 40 na ka mga tawo ang nakalas sa maong dapit tungod sa aksidente.

Laing residente nga si Rachel Yaquit, 30, misaysay nga adunay mga estorya nga ‘taw-an’ ang maong lugar kay may mga drayber nga miingong dunay mokalit og butho nga “white lady” sa tungatunga sa maong dalan.

Ang maong lugar gihulagway ni PO3 Enerio Roxam sa Toledo Police Station nga “accident prone area.” Diha gihapon sa maong dapit madisgrasya ang V & J Bus nga gipanag-iya sa Corominas Bus niadtong 2010 nga mikalas og 15 ka pasahero ug 48 ang mga naangol.

Sa mao gihapong dalan nahitabo ang uban pang ngilngig nga mga aksidenteng gikalambigitan sa mga trak, bus, pribadong sakyanan ug motorsiklo nga mikalas na usab og daghang kinabuhi.

Kuwang sa warning signs

Samtang duna say higayong dunay motuktok sa pasaheroang bus apan paghunong sa mga drayber kay abi og dunay manaog walay pasaherong mokanaog.

Ang hepe sa kapolisan sa syudad sa Toledo nga si Supt. Henry Biñas, mibutyag nga sa inisyal nilang imbestigasyon ilang nasayran nga nawad-an og brake ang bus.Matud pa ni Biñas nga tulubagon gyud sa drayber ang nahitabo tungod sa iyang pagpabaya apan miangkon si Biñas nga kuwang gyud sa warning signs ang maong dapit ingon man ang dalan nga lugsongon ug kurbadahon nakadugang kini sa kalisod sa pagmaniobra sa mga sakyanan.     Lakip sa gisusi sa mga traffic investigators kung overloaded ba ang maong pasaheroan ug sutaon pa nila ang pamahayag sa mga pasahero nga diha pa lang sa Cebu City kusog na kini kaayo og dagan ug nakiglumba sa laing pasaheroang bus ang drayber nga si Pastidio.

Nangayo’g pasaylo

Apan si Pastidio nga nakahinabi sa mga tigbalita misaysay nga sa una niyang yatak sa brake sa pag-abot sa hump migana pa kini apan diha nga milugsong na sila miyatak siya pagbalik sa brake apan mibasiyo na kini.

Nangangkon siyang ‘normal’ lang ang iyang dagan apan kay wala nay brake nabalaw siya og kontrolar sa manobela hangtud nga sila natikalbong. “Mangayo gyud ko’g pasaylo nila (mga biktima ug kabanay) tungod kay disgrasya man gyud ang nahitabo. Ako gani, miuban na lang ko sa trak (bus) ako na lang gyud nga gipiyong akong mata. Pamahala na lang gyud to akoa kun magkinaunsa man kay wa na man gyud nako makontrolar ang trak (bus),” pasabot pa ni Pastidio.

Human matakilid ang bus ug nadaro sa dalan adto kini napunta sa gate sa panimalay nga gipanag-iya ni Maria Bacalso. Si Pastidio miingon nga ‘last trip’ na unta niya kadtong biyahia nianang adlawa ug miklarong iyaha gyung gi-check ang bus una pa siya mibiya sa garahe nianang buntag

Nagkagulkol

Samtang usa sa nakalingkawas nga si Teresita Tabañag nga iyaan sa 16-anyos nga nakalas misaysay nga 300 metros ug makita na ang paril sa balay diin sila madasok human sila natumba, nakabantay siyang daan nga aduna nay nagkagulkol sa ilawom nga sa iyang paminaw dunay natangtang o naluag sa ilawom. Sa kakulba niya mibarog siya sa bus ug nangaliya. Ang iyang mga pag-umangkong mga babaye (lakip ang 16-anyos nga nakalas) nagtupad sa lingkuranan ang 16-anyos nga dagaton didto kini sa may bintana.

Ang 16-anyos mogradwar na unta karong Marso sa high school matud pa sa inahan niining si Generosa. Naglaom unta silang masulod kini sa honors tungod kay 3rd honor kini sa miaging tuig. (Lesley Caminade-Vestil ug Darrel Carumba/EIM) (BANAT NEWS)