Mga anak mitigbas ug midunggab sa ilang mama ug papa

CEBU, Philippines - Usa ka inahan ug usa ka amahan ang nangaangol human parehong nadagmalan sa ilang mga anak sa managlahing hitabo niadtong  adlaw’ng Biyernes.

Sa Daanbantayan, talandugon ang kahimtang sa usa ka Pacita Rusillo, nga taga sitio Guinharapan, barangay Bagay sa lungsod sa Daanbantayan  dihang kini  gitagod og tigbas sa anak nga si Alfonso Rusillo, 44.

Si Alfonso giingong dunay deperensiya sa pangisip sumala pa ni PO1 Brian Densing sa Daanbantayan Police dihang nahinabi sa Banat News.

Sumala pa nga gibadlong ra sa inahan ang anak tungod kay nagsige kini og tabi nga nag-inusara apan giingong naputong ang anak ug mikuha og sundang dayong tagod og tigbas niini sa nawong, lawas ug bukobuko.

Nakalingkawas ra ang inahan human moresponde ang mga tanod ug gidala kini sa Daanbantayan District Hospital.

Ang anak nga suspek gidakop ug nakuha gikan niya ang sundang nga nagkadugo pa nga maoy iyang gigamit pagtigbas sa inahan ug kasamtangang gitanggong karon sa karsel sa kapolisan samtang nagpaabot kun mopasaka ba og tukmang kaso ang kabanay niini.

Sa laing insidente, usa ka Santiago Kho, 55, taga barangay Gun-ob, dakbayan sa Lapulapu ang nalandig sa tambalanan human giunay og dunggab sa 27-anyos niining anak nga si Emmanuel.

Matud pa ni PO2 Winston Ybañez sa Homicide Section sa kapolisan sa maong dakbayan nga nahinabi sa Banat News nga naglalis ang biktima sa iyang asawa ug naabtan kini sa ilang anak gikan sa iyang trabaho.

Ang anak nga midapig sa iyang inahan ug wala na makapugong sa iyang kapungot mikuha kini og kutsilyo ug gidunggab ang amahan niini sa abaga.

Ang biktima daling midagan gawas sa ilang balay ug nagpahatud sa tambalanan samtang wala na maabti sa mga polis ang suspek diha sa balay. (Darrel Carumba ug Romeo T.  Limpangog/EIM) (BANAT NEWS)