Bata-bata sa mayor na-imbargoha'g armas

CEBU, Philippines - Napaslak sa karsel ang bata-bata  sa mayor sa lungsod sa Santa Fe, Bantayan Island,  human sikopa sa kapolisan sa lungsod gumikan sa pagtangkil  og  armas  de fuego  nga  walay lisensya atol  sa pista  sa barangay  Looc, sa maong  lungsod niadtong  Biyernes  sa alas 8:20 sa gabii.

Ang nadakpan giila  sa kapolisan  nga si Ermie Pescante, 42, ulitawo, taga barangay Maricaban, ug nagpuyo sa pinuy-anan ni kanhi mayor Roger Ilustrisimo ug kapikas nga si Mayor Jennifer Ilustrisimo.

Si Kagawad  Jose Espinosa Jr., sa Pooc maoy nakasikop sa suspek nga nagdala dala og paltik nga kalibre 38 nga armas nga dunay lima ka buhing bala sulod sa cylinder niini. Si PO2 Erik Ilustrisimo, imbistigador sa Sta. Fe Police Station dihang nahinabi sa Banat News mibutyag nga si Espinosa  maoy naghatud  sa suspek ngadto  sa ilang  buhatan  human  kini  niya  hidakpi.

Hinuon  human  sa  mga  sabot-sabot naareglo ra ang maong kaso  tungod  kay giingong way gana si Espinosa nga  mopasaka  og  kaso  sa  suspek.

Ang iya  lang  Espinosa  “record  purposes” ra kuno hinungdan  nga  gipagawas  dayon gikan sa prisohan si Pescante.

Wala usab mokompirmar  si PO2 Ilustrisimo  nga  si Pescante, usa  sa  mga  bata- bata ni kanhi mayor Ilustrisimo  apan iyang gitug-an nga nagpuyo kini sa pinuy-anan sa magtiayon nga kanhi mayor ug Mayor Ilustrisimo.

Si SPO1 Desabelle Wainright, desk officer sa Sta. Fe Police  Station mibutyag  sa Banat News nga mitumaw si kanhi mayor Ilustrisimo  sa  ilang buhatan  ug maoy mitabang og hangyo kang kagawad Espinosa aron  sa pag- areglo  sa maong  kaso. Gisuwayan unta pagkuha  sa Banat News  og habig ang kampo ni kanhi mayor Ilustrisimo ning maong isyu apan walay opisina kagahapon sa munisipyo ug wala  masayud ang kapolisan sa  telephone  number  sa mayor.

Samtang si mayoralty candidate Jose Titing Esgana sa iyang bahin mipadayag pinaagi sa text message nga obstruction of justice ang gihimo sa kanhi mayor nga pag-areglo sa tawo niini nga nakahimo og kalapasan bahin sa illegal possession of firearms.

Si Esgana  mi-apelar  sa mga opisyal sa lungsod nga angay ipatigbabaw nila  ang balaod ug dili sila  angay  mag-abuso  sama sa pagdupa niadtong mga tawo nga nakahimo og kalapasan sa balaod. (/WC) (BANAT NEWS)