Padung magbilar gikilatan

CEBU, Philippines - Wala makabilar ngadto sa usa ka minatay ang usa ka lalaki human kini giingong naigo og kilat pasado alas-8 sa miaging gabii diha sa sitio Saksak barangay Bahay lungsod sa Sibonga.

Ang namatay mao si Elerino Quintero, 31, molupyo sa maong lugar kinsa nakaangkon og 3rd degree burns sa iyang kalawasan.

Sa pakighinabi sa Banat News ni PO2 Eduardo Semilla, sa Sibonga Police Station  si Quintero nag-uban sa iyang asawa patubang na unta nga mamilar sa silingang minatay.

Apan dihang nangabli na sa pultahan si Quintero aron mogawas sa ilang balay kalit nilang nadungog ang lipak sa kalangitan nga may kusog kaayong pagkilat, diha na lang nila mabantaying nahagba na si Quentiro sa salog.

Daling gitabang sa asawa ug kabanay si Quintero ug gidala sa Dr. Deiparine Medical Clinic apan gideklarar kini nga dead on arrival tungod sa grabeng pagkapaso sa lawas niini.

Matud pa ni Semilla nga ang asawa sa namatay nga si Rodelysa nakuyapan og makadiyot dihang mikirig ang iyang bana ug pagmata niini una pa kini nakapangayo og tabang sa mga silingan.

Ang balay sa magtiayon nahimutang tulo ngadto sa upat ka kilometro gikan sa National Highway. Ang patay’ng lawas sa biktima ipaubos usab sa awtopsiya kini aron masayran kun aduna bay foul play.(EIM) (BANAT NEWS)