Naghikog kay wala maapil sa maka-graduate

CEBU, Philippines - Pagpasaylo maoy gipangayo sa naghikog nga 22-anyos nga graduating sa kursong Bachelor of Science in Marine Transportation (nautical) sa usa ka unibersidad dinhi sa Sugbo tungod kay wala maapil ang iyang pangalan sa mga mopaso.

Si Jovan Vincent Miana, 22, patay na nga nagbitay sa kisame sa lawak sa giabangang boarding house sa V. Gullas St. barangay Sto. Niño ning dakbayan dihang napalgan kagahapon sa hapon sa iyang higalang si Ian John Belogolo.

Si Miana sumala pa sa mga imbestigador sa Homicide Section sa Cebu City Police Office nagbilin og sulat nga alang sa iyang ginikanan, higala ug hinigugma nga nangayo og pasaylo sa iyang gibuhat.

Nangayo usab siya og pasaylo nga wala siya makapaso ug sa kauwaw nga nahatag ngadto sa iyang mga ginikanan.

Samtang si Oneil Mondragon, 29, nga maoy usa sa katapusang gikakuyog sa biktima mihulagway nga namatikdan niyang nausab ang linihokan ni Miana niana pa lang miaging gabii.

Sumala pa nga grabe kaayong nakakiat si Miana samtang sila nag-inom ug nagkantakanta sa videoke ug nangilog pa kini og mikropono nga dili niya sagad buhaton.

Kagahapon sa buntag sumala pa ni PO1 Nilo Aventurado sa Homicide Section nangabot ang ginikanan ni Miana aron unta sa pagtambong sa graduation sa anak dala ang toga nga sul-obon niini. Ang kapolisan, walay nakitang timailhan nga ang biktima adunay foul play sa kamatayon niini.  (BANAT NEWS)