Rabies Free Mandaue gitinguha sa City Vet

CEBU, Philippines - Gipahibalo sa Mandaue City veterinarian nga hingusgan pa nila ang programang Rabies Free Mandaue hangtud sa tuig 2020 karong dunay gipagawas nga pundo ug nakapalit ang dakbayan og mga kahimanan sa maong kampanya.

Si Dr. Daisy Penetrante nga maoy city veterinarian sa Mandaue mibutyag nga nakadawat na sila og duha ka bag-ong sakyanan ug lima ka motorsiklo alang sa ilang hingusgang kampanya ug sa pagpatuman sa balaod bahin sa pagpangihaw og mga hayop diha sa siyudad. Niadtong miaging Miyerkules gitunol ni Mayor Jonas Cortes ang maong mga sakyanan nga mibalor og P1.8 milyones.

Si Penetrante nagkanayon nga gamiton nila sa task force dog pound, task force hot meat ang mga sakyanan ug ang lima ka motorsiklo maoy gamiton sa mga meat inspectors sa kamerkaduhan pagsusi kung legal nga giihaw ang gipamaligyang karne. Ang kampanya kontra rabies himuon pinaagi sa pagpamakuna ug pagpanakop sa mga irong libud-suroy sa kabarangayan. Niadtong 2011 miabot sa 8,000 ka mga iro gikan sa 27 ka barangay sa dakbayan  ang ilang nabakunahan og anti-rabies, kini sagad gikan sa mga subdivisions sa dakbayan.

Sa sunod tuig, ang mga hilit nga barangay  sa dakbayan na usab ang ilang adtoon aron mamakuna sa mga binuhing hayop. (/EIM) (BANAT NEWS)