Ang katungod sa hayop

CEBU, Philippines - Nakahatag  og  maayong leksyon  sa mga katawhan  nga nagbuhi  og mga kahayopan  ang  dili pa dugay  nga  gisaulog  nga  Animal Welfare  Week.

Sumala pa ni Dr. Verna Lagriam, Department of Agriculture (DA) 7 Animal Welfare Regional Coordinator  nga ang  mga lektura  nga  ilang  gipahigayon sulod  sa usa ka semanang kalihokan  nagpabusog  sa katawhan  sa  igong  kaalam alang sa  tukma  ug  hustong  paagi  sa pagbuhi  og  mananap sama  sa iro, iring ug uban  pang  matang  sa hayop.

Matud  ni Verna  nga  daghan kaayong  tawo  nga  ang  pagtratar  sa iro, iro  gayud  ug  wala  na  nila  tan-awa  nga  ang  kinabuhi  sa iro sama  ra  usab  sa tawo. Iyang  gipasabot  nga dili  kumo kay iro, iro  na  gayud  ang maong hayop, kay  ang  tawo  nga kaantigo momahal  og hayop sama sa iro, mahimong  iyang atimanon sama  sa iyang  pag-atiman  og  anak.

Sa bahin  ni Dr. Alice  Utlang  ang  Cebu City Veterinarian, kini  nagkanayon  nga  ang tawo  nga  di  mahigugmaon og hayop, delikado  ug peligro  kay  may  pagka-brutal  kining  matanga  sa pagkatawo. Ang  tawo  nga  maayo  o may malumo  nga kasingkasing sayon  ra  mailhan  basi  sa kinaiya  niini sa bata  pa  siya, sumala  ni Utlang.

Ang bata  nga  hinagmal  og hayop, inigkadako sa maong bata, delikado  og  kinaiya ug  peligro  kaayo  nga mahimong kriminal.

Busa  matud  pa ni  Utlang  nga ang pagsaulog  sa  tinuig  nga Animal Welfare Week matag  unang semana  sa Oktubre, naghatag  og  pahinumdom  sa tawo  nga  may balaod  nga nagbuot  nga  angay higugmaon  ang hayop sama  sa tawo  ug  ang  pagpaantos sa hayop nagpasabot  nga wala  siya  higugmaa  sa nagbuhi  kaniya.

Sama  ra  sa  mamuhi  og iro, unya  pasagdan  lang  nga kini  nga  mahimong latagaw ug libud-suroy  kay walay  ikapakaon  ang  tag-iya , usa  kini  ka panamastamas  sa katungod  sa hayop   sumala  pa ni Utlang.( /WC) (BANAT NEWS)