Garcia ug Sereno meet makasaysayanon — Kapitolyo

CEBU, Philippines - Giisip sa kagamhanan sa lalawigan sa Sugbo nga usa ka makasaysayanong panghitabo ang labing unang panagtagbo sa labing unang babaye nga gobernador sa lalawigan sa Sugbo, Gov. Gwendolyn Garcia, ug sa labing unang babaye nga Chief Justice sa Korte Suprema sa nasud sa Pilipinas nga si Chief Justice Maria Lourdes Sereno.

Nahitabo kini atol sa paglusad sa Justice on Wheels dinhi sa Sugbo niadtong adlaw nga Miyerkules, Septiyembre 19, 2012 nga gipahigayon didto sa Mandaue Hall of Justice.

Sumala pa ni Garcia nga iyang gihiklin ang ubang gimbuhaton aron lang magkaatubangay ni Chief Justice Sereno dinhi sa Sugbo tungod kay makasaysayanon kining kalihukan.

Si Garcia mao pa ang unang natudlong babayeng gobernador sa Sugbo samtang si Sereno maoy gihulip sa gipalagpot nga kanhi chief justice nga si Renato Corona mao usab ang labing unang babayeng nakahupot sa maong posisyon dinhi sa Pilipinas.

Si Garcia aduna karoy kasong nag-ungot sa Sandiganbayan may labot sa kontrobersyal nga Balili property.

Si Chief Justice Sereno gikuyogan sa nagkadaiyang mga mahistrado sa Supreme Court, ug mga ubos nga mga hukmanan dinhi sa Sugbo. Kauban usab nila isip bisita ang mga huwes sa nasud Nepal pinanguluhan ni Nepal Supreme Court Justice Kalyan Shrestha.

Ang chairman sa Committee on Enhanced Justice on Wheels nga si Justice Del Castillo mipasabot nga ang tumong ug katuyoan sa nahisgutang programa mao ang pagpadali sa pagdagan sa ligid sa hustisya.

Pinaagi sa maong programa subayon ug desisyonan dayon ang mga kaso sa mga akusadong wala’y klaro ug huyang ang mga ebidensiya batok kanila. Tungod sa kakulangon sa mga hukom daghang mga kaso ang wala pa mahusay ug gipangagup-op nalang sa mga aparador sa hukmanan.

Nasayran nga kapin na sa 6 mil ka mga kaso ang nasulbad sa Justice on Wheels Program sukad kini gilusad.  (BANAT NEWS)