HINDI ko na naalala ang babala ni Mr.Dy sa akin na seloso siya kaya wala akong dapat paglingkuran kundi siya. Matindi ang nararamdaman ko kay Mon nang mga sandaling iyon kaya nakalimutan ko na ang babala. At isa pa, wala naman siya rito sa Pilipinas. Baka ilang araw sa Hong Kong. Iyon siguro ang dahilan kaya wala akong kakaba-kaba habang nakikipag-ulayaw kay Mon.
Hayop si Mon dahil ang mga kakulangan ng Tsekwa ay pinunuan niya. Sa totoo lang, talagang mahusay magpaligaya si Mon. May kung anong pangiliti yata ang tarantado at para ako’y hinihigop na hindi ko maintindihan. Si Mr. Dy kasi ay basta sasakay at pagnakatapos ay walang anumang bababa. Parang sumakay sa dyipni na prenteng-prente at saka papara at bababa. Walang katurya-turya. Parang mas mainam pa si Prof na kahit matandang binata ay may kaunting likot. Si Mr. Dy ay ang sarili lang ang iniintindi, siguro’y dahil negosyante, pakabig lagi ang iniisip.
Si Mon, talagang sanay sa pakikipaglaban. At dahil sanay na magpaligaya, nalimutan ko na ang ginawang pagtalikod sa akin. At saka naipaliwanag na naman. Siguro nga’y talagang mahal ako dahil gusto pala niya akong i-rescue kay Mr. Dy. Muntik pang mapatay dahil sa akin.
Nang matapos ang pag-uulayaw namin ni Mon ay naisuhestiyon ko na bakit hindi pa niya ako kunin ngayon. Mas mabuti at nasa Hong Kong si Tsekwa.
“Yan talaga ang balak ko, Maritess kaya lang baka hindi agad tayo makapunta sa Sablayan. Kung sa Marikina tayo titigil baka masundan tayo. Maghintay tayo ng ilang araw pa. Hindi pa naman darating si Tsekwa.”
“E bakit hindi pa ngayon?”
“Wala pa tayong titirahan sa Sablayan. Sabi ng pinsan ko, maghahanap pa siya.”
“Sa ibang lugar.”
“Mas gusto ko sa Sablayan dahil safe roon.”
Tumahimik na ako. Naniniwala na ako.
Nang malapit nang magtanghali ay nagpaalam si Mon.
“Aalis muna ako pero babalik ako mamaya.”
“Mamayang gabi?”
“Oo.”
“Baka biglang dumating si Mr. Dy e mahuli tayo.”
“Hindi pa yun darating. Basta darating ako. Hintayin mo ako,” sabi at nagmamadaling umalis si Mon.
Kinabahan ako. Delikadong mahuli kami.
(Itutuloy)