HALATA ko sa ekspresyon ng mukha ni Tita Raquel na kasabwat siya ni Michelle. Kaya hindi siya makapaniwala nang makitang nakabalik ako. Hindi nagtagumpay ang balak na mawala ako sa karamihan ng tao sa SM-North EDSA. Pero hindi ako nagpahalata na alam ko na ang kanilang balak. Nagtanga-tangahan pa rin ako. Tutal naman, iyon ang pagkakilala sa akin ni Tita Raquel e ’di paniwalain ko na. Kaya lamang, me tanga bang nakabalik sa bahay. Sabagay kahit ang pusa, iligaw mo at tiyak na makababalik din — ako pa kaya?
“O nasan si Michelle?” Tanong ni Tita Raquel na ang mga kilay ay nagsalubong. Halatang dismayado.
“E nawala po siya sa comfort room. Hindi ko na makita. Matagal ko pong hinintay pero hind na nagbalik.”
“Iniwan ka ba?”
“Ewan ko po Tita. Umihi kasi siya at ako ay umihi rin. Paglabas ko sa cubicle, wala na siya.”
“Tatanga-tanga ka kasi. Dapat hindi ka sumabay sa pag-ihi.”
“E ihing-ihi na po kasi ako.”
“Tiisin mo, punyeta ka!”
Hindi na ako sumagot. Hayop talaga!
“Uli-uli kapag nag-CR ang kasama mo, huwag kang makikisabay. Tiyak na hinahanap ka nun! Punyeta ka talaga, Ara!”
Gusto kong sagutin na “punyeta ka rin!” Pero minabuti kong manahimik. Alam kong kaya siya galit na galit ay dahil nabigo ang anak na maldita na maili- gaw ako. Hindi akalain ng kaliweteng si Tita Raquel na makababa-lik pa ako.
“Sige, linisin mo uli ang banyo, punyeta ka!”
Ginawa ko ang sinabi ni Tita Raquel. Nang matapos kong linisin ay sumimple akong pinuntahan si Ate Flora na noon ay hindi pa natatapos sa paglala-ba. Ikinuwento ko ang nangyari. Napailing-iling si Ate.
“Mabuti na lang pala at nasabi kong magbaon ka ng pera.”
“Oo nga Ate. Kung hindi, baka kung kanino ako namalimos.”
“Kaya sa susunud-sunod na umalis ka, magdadala ka ng pera at ilista mo ang phone number dito.”
Hapon na nang dumating si Michelle. Palihim kong narinig ang usapan ng mag-ina sa salas. Akala ng malditang Michelle ay wala pa ako sa bahay.
“Nailigaw ko Mom-my ang probinsiyana,” sabing nakangisi.
“Tange ka. Kanina pa narito si Ara.”
“Ano?”
“Palpak ka, Michelle!”
Noon ko napatunayan na talagang plano nilang iligaw ako. Gusto nilang mapahamak talaga ako.
(Itutuloy)