CEBU, Philippines - Pakyas na sab ang Team Philippines sa ilang ambisyon nga mohakot og mas daghang gold medals sa 27th Southeast Asian Games.
Kini bisan pa'g midaog og gold medals ang mga taekwondo jins nga silang Kristie Elaine Alora ug Kristopher Robert Uy ug ingon man sab ang muay thai bet nga si Preciosa Ocaya kaniadtong Sabado apan gilansang lang gihapon sa ikapitong pwesto ang Philippine Tream didto sa Nay Pyi Taw, Myanmar.
Gipukan ni Alora ang Cambodian nga karibal nga si Sorn Davin 6-4 sa women's over-73kg category finals ug gikaluhaan dayon ang iyang gold ni Uy sa heavyweight division kinsa midaug batok kang Vietnamese Quang Duc Dinh 7-6 sa ilang gold medal match sa over 87kg category didto sa Wunna Theikdi Stadium.
Ang 24 anyos nga si Ocaya nga lumad taga Nagcarlan Laguna, yano kaayong midaug batok sa iyang karibal sa Thailand nga si Phithsaya Phoumchanh alang sa women's 54kg class.
Hinoon, ang maong kalampusan kagahapon igo lang naghatag sa Pilipinas og 29 ka gold medals ug biya kini'g lima ka gold sa Singapore kinsa maoy nahimutang sa ika-unom nga pwesto.
Anaa karon sa mga players sa sepak takraw kung molampos ba ang Pilipinas paghakot og 30 ka gold medals nga gilauman sa atong mga sports officials. Ang sepak takraw team gilangkuban nilang Emmanuel Escote, Jason Hurte ug Rhey Jhey Ortouste. (BANAT NEWS)