CEBU, Philippines - Gipamatud-an sa Chiang Kai Shek College nga sila maoy labing maayong high school team sa Milo Best SBP Passerelle division human sila modaog batok sa University of San Carlos (USC), 79-50 aron sakmiton ang championship trophy niadtong Sabado didto sa San Fernando, Pampanga.
Ang Chiang Kai Shek College gipangulohan ni John Gallego nga mipabuto'g 22 puntos, gisundan ni Jonas Tibayan sa iyang 12 puntos.
Silang John Galinato, Kent Malazarte ug Scott Aying pulos miiskor og otso puntos alang sa USC.
Kanunay naglabaw ang Chiang Kai Shek ug sila sab ang nagdominar sa tanang departamento nga naglakip sa rebounds ug assists.
Gawas pa niini, maayo sab kaayong nakaduwa ang ilang mga bigmen.
Sa first quarter lang nahimong sikit ang duwa kay si Gallego miiskor og 12 puntos sa second period dayong lubong sa USC.
Upat lang ka players sa Chiang Kai Shek ang miduwa sa third quarter, apan wala lang gihapon sila matarog tungod sa mga puntos gikan nilang Francis Bait ug Tibayan.
Sa SBP Division finals, gilubong sab sa La Salle Greenhills ang ilang sister team nga University of St. La Salle-Bacolod sa iskor nga 61-40.
Si Luis 'Basti' Locsin, anak ni kanhi PBA player Noli Locsin maoy nangu sa La Salle Greenhills sa iyang 13 puntos, samtang ang La Salle-Bacolod gipangulohan nilang Yuki Kamei ug Kyle Ramos nga miiskor og 10 puntos matag usa. (BANAT NEWS)