Seryuso ang pasangil sa prosekusyon sa impeachment trial ni Bise Presidente Sara Duterte: Duna siyay gikan sa ?818 milyones ngadto sa ?1.5 bilyones nga hidden wealth. Tubag sa depensa: Kayamukat.
•Mga testigo ni VP Sara nagpalabwanay sa gidaghanon sa mga pangutana nga dili nila matubag ug mga detalye nga wala nila mahinumdomi (apil nang usa nga wala kaila sa iyang kaugalingong pirma, lain nga wala kahinumdom unsay mga lugar nga naadtoan sa iyang biyahe sa China ug lain pa g’yud nga wala kahinumdom sa iyang kanhi gitrabahoan);
•Nabisto nga ang mga yuta nga gilista ni VP Sara sa iyang Statement of Assets, Liabilities and Net worth (SALN) nahimutang sa duha ka managlahi nga mga barangay, managlahi ang mga tuig nga narehistro ug managlahi ang mga presyo sa SALN ug sa deed of absolute sale;
•Abogada nga niinsistir nga walay labot si VP Sara sa GenCorp Industries Inc. pero nakadawat og kuwarta gikan sa kompaniya samtang bise presidente na gikan sa 2022 hangtod 2025 (mas makapakugang pa g’yud ang mga numero: loose investment nga ?46,875 niadtong 2007 niburot ngadto sa ?2.14 milyones sa 2025);
•Niinsistir ang bana ni VP Sara nga si Mans Carpio nga siya ang mobayad sa ?205,000 nga panihapon sa Tokyo, Japan, uban sa iyang mga higala aron makakuha og dugang points sa iyang credit card; ug
•Defense lawyers ni VP Sara kalit lang nipasibog sa tanang 16 ka bank executives nga ilang gipa-supina sa Senate impeachment court, nahinayak og biya sa ilang mga trabaho ug nag-coat and tie nga nagpanon sa Senado pero gipapauli sa walay klaro nga rason (usa nila nalilian sa prosekusyon nga mo-authenticate unta sa dollar accounts ni VP Sara).
Sa gawas sa impeachment trial, nipakita ang impersonator ni VP Sara kay nagpasumangil nga nigamit sa pansayan. Pero ang orihinal walay klaro moatubang ba aron mangunay pagtubag sa mga pasangil batok niya.
Nagpabilin nga wala matubag ang mga pangutana: Diin gikan ang iyang kuwarta? Nganong gitago sa SALN? Ang salida sa depensa mahimong makapakatawa sa pipila. Pero ang impeachment trial dili komedya. Ang pagpaningil sa katawhan giunsa sa paggasto ang ilang buhis dili kabugalbugalan.