Pamilyar ang taktika sa depensa sa Senate impeachment trial pagbawi sa dakong kadaot sa kumpisal ni kanhi special disbursing officer Gina Acosta nga si Bise Presidente Sara Duterte ang nagsugo niya paghatag sa tanang ?500 milyones nga confidential funds sa Office of the Vice President (OVP) ngadto ni Koronel Raymund Dante Lachica.
Aron pagpapas sa giangkon ni Acosta nga koneksiyon ni VP Sara sa bulilyaso, pinahimuslan ang usa ka semanang lugway tungod sa baha sa Metro Manila, gitudloan sa depensa si Acosta pagpalayo ni VP Sara gikan sa pataka nga gasto.
Ilang gisugo si Acosta, aron dili malibog, sa pag-memorya og usa ra ka tubag. Nga maoy iyang gibalikbalik bisan unsay mga pangutana ni Private Prosecutor Amando Virgil Ligutan ug sa senator-judges.
Samang taktika ang gigamit sa mga magtatambag sa OVP, nga posibleng dako sab karon og tingog sa direksiyon sa depensa sa impeachment trial, dihang si VP Sara ni-atubang niadtong 2024 ug nagdumili sa pagtubag sa mga pangutana sa mga sakop sa appropriations committee sa House of Representatives parte sa iyang confidential funds sa 2022 ug 2023.
Lahi sa unang atubang ni Acosta niadtong Agosto 17, kanus-a daghan siya og sulti, usa ray tubag sa tanang pangutana sa husay niadtong Agosto 24: Akong gihatag ang kuwarta ni Lachica, your honor, kay siyay eksperto pagpatuman sa mga proyekto sa confidential funds. Wala ko kahibawo giunsa ang kuwarta kay confidential ang mga detalye, your honor.
Ug sa mga pangutana sa ?2.6 bilyones nga confidential funds sa Davao City: Wala koy mahinumdoman, your honor.
Palihug ikumparar sa tubag ni VP Sara sa tanang pangutana sa mga kongresista niadtong Agosto 27, 2024 (wala gani magtagad pag-memorya kay gibasa ra sa iyang telepono): “I would like to forego the opportunity to defend the budget in a question-and-answer format. I will leave it up to the House to decide on the budget submitted.”
Ug sa iyang tubag sa subling pag-atubang sa mga kongresista niadtong Septiyembre 3, 2024: “She may not like my answer. She may not like how I answer. She may not like the content of my answer, but I am answering.”