Kon nahibawo si kanhi Department of Public Works and Highways secretary Manuel Bonoan sa dakong kalainan sa “MYPS (Multi-Year Programming and Scheduling) coordinates,” nga gigamit sa pagplano sa mga proyekto, ug sa “As-Staked Coordinates,” nga gigamit sa mga kontraktor sa aktuwal nga pagtukod sa mga proyekto:
Nganong ang MYPS coordinates may iyang gihatag sa Malacañang ug sa Sumbong sa Pangulo website; mao’ng
Nasaag ang Philippine National Police (PNP), Armed Forces of the Philippines (AFP) ug National Bureau of Investigation (NBI) sa pag-ila sa 421 ka ghost projects sa tibuok nasud?
Hangtod sa iyang pag-atubang sa Senate Blue Ribbon Committee niadtong Lunes sa hapon, human nabisto ang makalilisang nga mga ebidensiya sa ?1.7 trilyones nga flood control scandal, si Bonoan niinsistir lang gihapon nga wala siya mapisiki og bisan usa ka dako sa piyesta sa kinawatay sa iyang mga sakop nga nakigkonsabo sa mga politiko ug mga kontraktor.
Duha ang posibleng nahitabo sa iyang pagdumala sa DPWH sa unang kapin sa tulo ka tuig sa administrasyon ni Presidente Ferdinand Marcos Jr.: Naghagok sa puwesto; o siyay pangulo sa kawat.
Walay ganahang moangkon nga ang sayop nga coordinates maoy nakalangay sa pagpasaka sa mga kaso sa Sandiganbayan maong wala matuman ang saad sa presidente ug ni Ombudsman Boying Remulla pagpriso sa mga senador ug mga kongresista sa wala pay Pasko.
Pero nipahibawo si Justice Secretary Fredderick Vida nga sa 421 ka proyekto, 14 pay ilang nasusi pagbalik ug napamatud-ang ghost. Nihangyo siya sa bag-ong liderato sa DPWH pag-ila asay tinuod sa kaliboan nila ka proyekto aron gamay na lay imbestigahunon.
Ambot mao ba say rason nga wala pay nakiha nga bisan usa na lang ka politiko, kontraktor, ug opisyal sa DPWH sa Sugbo. Pasiunang report sa NBI sa Central Visayas nga walay ghost pero daghang substandard flood control projects sa Sugbo nagtimaan nga wala sila maproblema sa MYPS ug as-staked coordinates sa mga proyekto.
Pero kon tinuod ang kumpisal ni Vida nga kinahanglang balikon ang tanang mga proyekto nga nasusi sa PNP, AFP, ug NBI aron pagsegurong makabarug ang mga kasong ipasaka nila sa Ombudsman ug Sandiganbayan, kanus-a pa man intawon mahuman?