Karong nag-unay naang duha ka bugoy, nga nagpulipuli og kulata nato, unsa man ang atong buhaton? Mopili ba kinsa ang atong dapigan? O motan-aw ug magpaabot lang kinsa ang magpabilin nga magbarug?
Ang labing maayo nga kapilian mao ang paglingkawas. Pero kinsa may kadangpan? Nga nahibawo man nga ang kinabag-an sa atong mga silingan tua kapusta sa duha ka bugoy? Nga si bisan kinsa nga ligdong nga alternatibo nga mangahas sa pagtanyag sa pagtarung sa atong lugar mameligro man nga, sama sa nangaging mga higayon, ila ra gihapon nga isalikway?
* * *
Ang unang bugoy nipasangil sa ikaduhang bugoy nga adik sa cocaine. Ang ikaduhang bugoy nisumbalik nga ang unang bugoy maoy adik sa fentanyl. Wa tay kapilian. Nahuman na unta ang kalbaryo ubos sa administrasyon nga nagsalimuang. Gipulihan ra sab dayon sa pamunoan nga bangag.
Ang unang bugoy nisaad og kalinaw sud lang sa pipila ka buwan. Mao na man hinuon ang nagpasiugda sa laktod nga pinatyanay sa kaliboan ka inosente nga mga biktima. Ang ikaduhang bugoy nipasalig og kalamboan. Mao na man hinuon ang nipasamot sa kalisod sa kinabag-an.
* * *
Ang duha ka bugoy pulos nisaad sa paglimpiyo sa administrasyon. Pero pulos sab nipasamot sa pangurakot:
• Ang unang bugoy way pupanagana nga nipaburot sa iyang bolsa ug sa mga sakop sa iyang mga pamilya ug sa labing suod nga mga higala, bisan ang labing grabe nga katalagman gipanguwartahan pa; samtang
• Ang ikaduhang bugoy, nga nakatumpi nang daan og ilegal nga katigayonan, nagsugod dayon sa mas lapad pang kinawatay mao nga may bayad na ang tanang pirma sa tanang ahensiya.
* * *
Mangiyugpos ba lang gihapon atubangan sa away sa duha ka bugoy? Bahala na kon ang samang pangiyugpos maoy nitugot nila sa pagsunod og yatak sa atong mga katungod ug tulis sa atong panudlanan? Di pa ba gihapon motagam sa pagpabaya bisan nahibawo na nga mahiagom lang sa dugang nga kaalaotan?
Nag-una ang duha ka bugoy. Kay nagsalig sa atong kalumoy. Bisan nagpuhalay kinsa ang mas dako og makawat kumbinsido sila nga padayon ta nga magsugmoy. Kon magkauyon unsaon pagbahin ang kinawat, nagtuo nga ila gihapon tang ma-untoy. Kanindot kon mapakuratan nga diay ta pulos pahoy.