Gipakuyog ko ni Consul Julie Alegrado-Vergara sa pagpanghatag og hinabang para sa mga biktima sa bagyong Odette sa Barangay Punta Engaño sa Lapu-Lapu City gahapon sa buntag. Kasagaran nila nagub-an sa ilang mga pinuy-anan ug naproblema sa suplay sa tubig.
Ang mga hinabang naglakip sa dakong putos nga dunay sud nga bugas humay, delata, binotelyang tubig, biscuits, ug mga sinina. Nagdala sab sila og higanteng mga tangke sa tubig nga mainom. Hapit tanan sa mga biktima nagdala nang daan sa ilang mga sudlanan sa tubig.
-o0o-
Pagsugod namo nihugop ang tanang nakadungog sa pag-apud-apod sa mga hinabang. Bisan ang mga wa malista. Gikuwestiyon nila ang kapakyas sa mga opisyal sa barangay sa pag-apil nila. Niinsistir nga dugay na silang mga molupyo sa Punta Engaño.
Ang mga opisyal sa barangay nga dunay mga biktima nga wa nila maapil sa listahan nitabang og hangyo nga mahatagan og hinabang ang mga wa malista. Nisugot silang Consul Julie nga hatagan ang tanang naglinya hangtod nga duna pay nahibilin nga mga hinabang.
-o0o-
Nakatabang ang mga polis sa pagpahapsay sa linya sa mga biktima. Ang mga wa malista gikuhaan og mga ngan ug gipapirma dayon nga gihatagan sa mga hinabang. May mga nilinya nga nangangkon nga nagrepresentar sa ilang mga paryente nga wa katunga.
Ang mga hamtong ug ubang nagbaguod sa mga hinabang, labi na sa dagkong sudlanan sa tubig, gitabangan sa mas baskog nilang mga silingan. Nahatagan ang tanang naglinya nga may sobra pang mga hinabang.
-o0o-
Ang mga hinabang hinatag sa Bluewater Maribago Beach Resort ug Entrepreneurs Organization nga pulos gipangulohan ni Consul Julie ug SRB Omicron Letran nga girepresentahan sa iyang bana nga si Vic Vergara.
Wa pa gani mahuman ang kalihokan nakadawat si Consul Julie og dugang pasalig sa hinabang para sa umaabot niyang relief operations. Sunod niyang hatdan og mga hinabang ang Carcar City sa habagatan ug ang Olango Island nga apil sa labing naggusbat ni Odette. Ang kahugpongan ni Consul Julie usa sa labing una nga nakatunol og mga hinabang sa mga biktima sa bagyo sa Sityo Buyong sa Maribago ug Barangay Agus sa Lapu-Lapu City.