Salamat nga nakaamgo ang pamunoan ni Presidente Rodrigo Duterte sa kabinuang sa ilang pagpalabi sa mga negosyo kay sa kahimsog sa publiko. Gipahibawo sa Department of Tourism (DOT) nga, sukwahi sa agresibo nilang pangumbinser sa nangaging mga adlaw, di mahinayon karong adlawa ang pagsugod sa tibuok buwan nga kampanya pagdasig sa katawhan pagtapok sa shopping malls sa tibuok nasud.
Niangkon si Tourism Secretary Bernadette Puyat nga nakumbinser sila sa pasidaan sa nagpakabana nga mga sektor sa katilingban nga mameligrong mas daghang matakdan sa COVID-19 kon ipamugos ang ilang shopping festival.
***
Masabot ang DOT nga nangita og mga paagi sa pagtabang sa industriya sa turismo nga maoy usa sa labing naapiki sa pagtidlom sa gidaghanon sa mga turista tungod sa travel bans nga gipahamtang sa mga nasud nga may daghang kaso sa COVID-19.
Makalibog hinuon ang ilang pag-awhag sa mga Pilipinhon sa pagsukwahi sa gisubli-subli nga mga pasidaan sa World Health Organization (WHO) nga bisan wa nay bag-ong mga kaso sa COVID-19 nga giangkon ang Department of Health sa Pilipinas sa nangaging mga semana, di gihapon ta angayng makumpiyansa.
***
Mas lisod sabton ang pagbali-bali sa baruganan ni Health Secretary Francisco Duque III nga mao untay labing suhito sa kaseryuso sa hulga sa pagkatap sa kagaw:
•Sa sinugdanan, giawhag niya ang publiko sa paglikay sa mga tapok ug pagkanselar sa kalihokan nga kinahanglang tambongan sa daghang katawhan;
•Dayon, niuyon siya sa DOT ug Department of Interior and Local Government nga mahimo nang mga tapuk-tapok; apan
•Tungod sa pasidaan sa WHO, niingon nga di pa diay angayng magtapok.
***
Mao ni giingon sa mga bugoy sa eskina nga, “better late than later.” Mas maayo na lang nga wa sila mahinayak sa paglibug-libog sa katawhan. Angay lang nga tabangan sa gobyerno ang mga negosyante, labi na ang mga mamumuo, nga labing naapiki sa paghagsa sa kalibotanong ekonomiya tungod sa COVID-19.
Mahimong ibanan o suspensuhon una ang buhis sa mga kompaniya, mas maayong tabangan ang mga mamumuo nga gitaktak o wa na kadawat sa ilang suholan, apan hinaot nga di na sila magpataka og pasiugda og mga lakang nga molawog sa kahimsog sa katawhan sa wa kinahanglang mga risgo.