Bisan sa iyang pag-insistir nga wa mahasol sa kaso nga iyang giatubang sa International Criminal Court (ICC), kay gawas nga way klarong mga ebidensiya wa pa g'yuy hurisdiksiyon ang ICC niya, ang agresibo nga panagang ni Presidente Rodrigo Duterte mahimo nga mopahimutang hinuon niya sa mas lawom nga gahong.
Nipasidaan silang Kongresista Gary Alejano sa Magdalo partylist ug kanhi kongresista Erin Tañada sa Liberal Party (LP) nga nagkadungan pagtambong sa Arangkada sa dyAB Abante Pa, Bisaya! gahapon sa buntag nga mahimo hinuon nga mas mopaspas ang lihok sa imbestigasyon sa ICC batok ni Duterte.
***
Gitataw ni Tañada nga di pa gani mapakisama sa preliminary investigation sa piskaliya dinhi sa ato ang gihimo sa ICC kay wa man pangayoi og tubag si Presidente Duterte. Nipasabot siya nga pasiuna pa kaayo ang pakisusi sa ICC sa mga panghitabo sa Pilipinas atubangan sa pasangil sa laktod nga pagpamatay sa kampanya batok sa drugas.
Mao nga nitambag si Alejano nga di pa g'yud unta angay nga mangisog ang presidente. Labaw nang wa unta kinahanglana ang pagpanghudlat nga iyang ipadakop si Chief Prosecutor Fatou Bensouda sa ICC.
***
Gidasonan nilang Alejano ug Tañada ang pasidaan sa Sugbuanon nga international human rights lawyer nga si Ruben Carranza Jr. nga may hurisdiksiyon ang ICC sa mga pagpanghudlat batok sa mga opisyal sa ICC aron nga di makatuman sa ilang trabaho.
Matod ni Tañada mahimong madugangan hinuon ang orihinal nga kaso nga giatubang ni Duterte sa ICC. Nipasidaan si Alejano nga mahimo gani nga mapugos na ang ICC sa pagpadakop dayon ni Duterte.
***
Nahibung si Tañada nganong wa katambag ni Presidente Duterte ang iyang tigpamaba nga si Harry Roque, kinsa nangangkon nga mao ray abogado sa Pilipinas nga may lisensiya sa pagbarug sa mga kaso sa ICC, sa tukmang mga lagda sa kalibotanong hukmanan.
Gidasonan ni Alejano ang pasidaan sa napriso nga si Senador Leila de Lima nga kon paundayonan ang presidente wa nay kalainan ang Pilipinas sa rogue states nga gitunglo sa international community. Matod ni Alejano di mangiyugpos lang ang United Nations ug ubang kalibotanong kahugpongan sa kampanya nga gilusad ni Presidente Duterte pag-awhag sa ubang kanasuran sa paggawas sa ICC.