Wala malilong sa katawhan nga gidili g'yud sa kagamhanan ang pagpamaligya og refilled LPG nga gisulod lang nianang gagmay kaayong lata nga para sa butane. Gisuportahan sa katawhan kining maong produkto tungod sa iyang kabarato nga mapalit lang og tag P15 ang lata.
Ang kabarato sa mao nga produkto dili g'yud bugti kun mawad-an ka og panimalay tungod kay daghan na kaayong mga higayon nga ang kalit nga pagsilaob sa mga butane canisters nga gisudlan na og LPG maoy nakamugna og sunog.
Tinuod nga makatabang kaayo sa mga kabus ang butane kay mapasayon man ang pagluto nila sa ilang pagkaon, ug susama ra usab ang ilang magasto kon mopalit sila og kahoy nga pangsugnod sa ilang pagluto.
Ang kagamhanan wala g'yud mohatag og pagtugot nga ang mga lata nga gisudlan og butane gamiton aron sudlan og LPG. Adunay mga namatigayon pinaagi sa pag-refill og butane nga hitsas sa ekipo aron masukod ang gidaghanon sa LPG nga isulod.
Apan ang problema mao ang gitawag og "backyard refillers" nga mopalit og usa ka cylinder tank sa LPG ug mag-refill sila nga mano-mano. Sa laktod, dili nila masukod ang gidaghanon sa LPG nga masulod, sigun ra sa bana-bana.
Kun mosubra ang gidaghanon sa LPG nga masulod ngadto sa butane canister, peligro kaayo nga makamugna og sunog tungod kay ang LPG kon makabatyag og kainit, mosaka ang iyang presyur ug kini mohungaw.
Bisan sa gibalik-balik nga pasalig sa mga butane/LPG canister refillers nga dili na sila mogamit sa mga tayaon ug nipis na nga lata, apan makakita gihapon kita niini diha sa mga baligyaanan, ilabi na sa mga gagmay'ng retailers niini nga produkto.
Patuga-tuga og negosyo unya tihik kaayo mogasto alang sa ilang patigayon kay dili mamalit og bag-ong lata nga ilang gamiton sa pag-refill og LPG. Kon gusto g'yud mo nga magnegosyo og refilled LPG, pagpalit mo og lig-on nga lata, kinahanglan unta nga baga ug kanang dili motaya.
Sa Talisay City, dunay tigbaligya og refilled LPG canister nga gironda sa kabomberohan ug sa kadagkoan sa City Hall ug gisakmitan sa daghang lata nga gisudlan na og LPG. Angay usab nga ang ubang local government units molusad og susama nga kampanya aron malikayan ang aksidente.
Kuyaw kaayo nga ang atong mga silingan mogamit og butane nga gitaya na, unya masunog, kay hayan maapil ang atong panimalay. Angay nga molusad na ang atong mga tinugyanan sa kagamhanan sa paghimo og kampanya aron sakmiton ang mga gitaya na nga lata sa LPG refilled canisters.