Matag isa sa PAGASA og public storm warning signals tungod sa bagyo, nga dasonan dayon sa Philippine Coast Guard pinaagi sa pagpugong sa biyahe sa mga barko, matanggong ang kaliboan ka pasahero sa apektadong mga pantalan. Ang gidugayon sa ilang pagkatanggong mag-agad sa lahutay sa hulga sa bagyo nga kasagaran molungtad og pila ka adlaw.
Makaluluoy ang matanggong nga mga pasahero. Labi na ang mga dayo nga way mga paryente nga kadangpan ug ang mga nihit og kuwarta nga igo na lang sa plite pauli mao nga gawas nga wa nay ikabayad sa hotels ug pensions wa pa gyoy ikapalit og pagkaon ug ubang inadlaw nga panginahanglan.
***
Sa labing uwahing ihap sa PCG, niabot na og 12,673 ka pasahero ang natanggong sa mga pantalan sa Sugbo ug ubang dapit sa Kabisay-an ug Luzon nga may mga rota nga naigo sa bagyong Nina maong gigakotan ang 1,129 ka Ro-Ro vessels, 53 ka barko; ug pito ka bangka.
Pipila sa natanggong nga mga pasahero sa Sugbo nga para Manila nitiyabaw nga ang nahibilin nilang kuwarta igo na lang ipalit og biskwit nga maoy ilang gisaligan sukad pa sa adlaw sa Pasko. Kay Miyerkules pa man gitakdang mogawas si Nina, mahimong madugangan pang ilang kalbaryo. Sa kasamtangan, kinsa man ang motabang nila?
***
Nag-iyahay og balibad ang ilang gipangayoan og tabang:
•Ang mga kompaniya sa barko niingon nga di silay sad-an sa pagkatanggong sa mga pasahero, gani utro sang naalkanse sa pagkakanselar sa biyahe sa ilang mga barko;
•Ang Cebu Port Authority niingon nga di nila responsibilidad ang pagpakaon sa matanggong nga mga pasahero, bugtong ikatabang mao rang pagbutang og dugang mga tolda gawas sa passenger terminals aron nga di sila mainitan ug mauwanan; ug
•Ang Cebu City Disaster Risk Reduction and Management Office nanghunaw nga di magamit ang ilang pundo pagtabang sa natanggong nga mga pasahero kay wa maigo ang Sugbo sa bagyo.
***
Nakahatag nako og ideya unsaon pagtabang ang mga pasahero ang pahibawo sa Office of Civil Defense (OCD) sa Central Visayas pinaagi sa DYAB Radyo Patrol nga magpada sila og hinabang sa mga biktima ni Nina sa Luzon. Nganong di man matabangan ang klarong mga biktima sa bagyo dinhi sa atong kaugalingong nataran?
Wa tuod maigo sa kusog nga hangin ug uwan ni Nina ang mga pasahero. Apan natanggong sila tungod sa bagyo. Busa angay gyong tabangan. Kinahanglang sublion sa National Disaster Risk Reduction and Management Council ang ilang mga lagda. Aron katugotan ang OCD ug ang local disaster risk and management offices sa paggamit sa ilang pundo alang sa mga biktimang naabtan sa gawas sa mga dapit nga direktang naigo sa katalagman.