Ang pagbarug ni Senador Bongbong Marcos atubangan sa iyang kaubanang senador sa labing unang sesyon sa Senado human sa piniliay sa Mayo 9 nakapabisto sa kahuyang sa iyang pasangil sa lapad nga maniobra pagtikas niya ug pagpadaog sa iyang kaatbang nga si Kongresista Leni Robredo:
• Niangkon si Marcos nga wa pa siyay mapakita nga ebidensiya sa pagpanikas;
• Nagduda lang siya nga ang kausaban sa script sa transparency server sa Commission on Elections gitumong di lang sa pagbasa sa letrang N? kon dili sa pag-usab sa mga numero sa iskutenyo; ug
• Wa siyang kaseguro kun ang naapektahan sa kausaban sa script mao ba lang ang mga boto sa vice presidential race.
* * *
Sa usa ka pung, nikumpisal si Marcos sa iyang privilege speech ug sa pagpanubag sa mga pangutana sa ubang mga senador nga ang bugtong gipasikaran sa iyang pasangil mao ang pagduda. Ug kay di man makita ang kinatibuk-ang proseso sa digital transmission sa resulta sa mga presinto ngadto sa servers sa Comelec, angay lang nga himuon ang information systems audit, ang pag-abli sa kinatibuk-ang sistema aron nga masusi ang tanang detalye sud sa information technology (IT) infrastructure.
Katungod ni Marcos ang pag-awhag og systems audit. Uyon sab gani si Robredo ug ang Comelec. Apan di ni maggamit ni Marcos paglangay sa opisyal sa iskutenyo.
* * *
Di kapasangil si Marcos nga gitago sa Comelec ang kinatibuk-ang infrastruktura sa automated election system (AES). Kay giablihan ang sistema ngadto sa IT experts ni Marcos ug sa tanang kandidato ug partido sukad pa sa Oktubre sa niaging tuig.
Human nabisto ang kausaban sa script, gipasud sa Comelec ug Parish Pastoral Council for Responsible Voting (PPCRV) ang IT experts ni Marcos aron makapaniid sa ilang quick count. Mga eksperto ni Marcos apil sa labing unang nahibawo nga dihang giusab ang script niburot ang labaw ni Marcos batok ni Robredo, sukwahi sa pangangkon ni Marcos nga ang pag-usab sa script maoy nakapahiyos sa iyang mga boto ug nakapaburot sa kang Robredo.
* * *
Nakabuylo nang opisyal nga iskutenyo sa National Board of Canvassers (NBOC) nga gisakpan sa pito ka senador ug pito ka kongresista. Ang pangu sa NBOC nga si Senador Koko Pimentel nibanabana nga bisan sa pagkuti-kuti sa mga abogado nilang Marcos ug Robredo sa matag usa sa 160 ka certificates of canvass (COCs), mahuman ang iskutenyo unya sa Lunes, kanus-a mahimong maproklamar na ang bag-ong presidente ug bise presidente.
Si Marcos usa sa mga politiko nga nagtuo nga kapalaran ang pagka presidente ug pagka bise presidente. Di mahimong planuhon. Di mahimong paliton. Di mahimong maniobrahon. Hinaot malinawon siyang modawat sa bisan unsang sangpotanan sa proseso. Sa way pagsuway paggusbat sa kaligdong sa sistema.