Ang pagpamalikas, pagpanginsulto, pagpanghagit og debate ni Davao City Mayor Rodrigo Duterte sa mga obispo sa Simbahang Katoliko maoy away nga wa kinahanglana sa iyang pamunoan. Kay kun simbako nagdahom siya mao sab ning awaya nga segurong di niya madaog.
Mas makaayo alang sa tanang hingtungdan kun sa iyang pangandam sa pagbanos sa Malakanyang sa udtong tutok sa Hunyo 30 unahon ni Duterte pag-umol ang mga programa pagtuman sa iyang saad pagsulbad sa drugas ug bangis nga mga krimen sa unang tulo ngadto sa unom ka buwan sa iyang pamunoan ug uban niyang mga pasalig nga giluwatan atol sa kampanya sa piniliay sa Mayo 9.
* * *
Angay’ng pahinumdoman si Duterte nga wa mangampanya ang Simbahang Katoliko batok niya. Ang pipila ka obispo ug pari nga nisaway sa iyang mga bisyo, binuhatan ug sinultihan pinaagi sa ilang mga wali o pastoral letters wa magrepresentar sa tibuok simbahan. May mga pari, obispo ug Katolikong kahugpongan nga nipaluyo sab sa iyang kandidatura.
Ang kinabag-an sa mga pari ug mga obispo wa manginlabot sa politikanhong mga kontrobersiya, hinunoa nitingob sa ilang panahon sa pagsangyaw ug pagpatin-aw sa mga pagtulon-an sa simbahan. Angay sang dawaton ni Duterte nga bisan unsa pay baruganan sa mga pari ug mga Obispo – pabor o supak man niya – angay’ng tahuron pagbarug sa ilang mga katungod.
* * *
Maong way sukaranan ang pangangkon ni Duterte nga ang niaging piniliay maisip nga referendum tali niya ug sa Simbahang Katoliko. Ug nga ang iyang pagdaog pagka presidente uban ang suporta sa kapin sa 15 milyones ka botante. Kay bisan sa pagpanginlabot sa pipila ka relihiyusong kahugpongan ang niaging piniliay di mahitungod sa relihiyon.
Gawas pa, mas daghan sa mga botante nga nagpanon sa mga presinto niadtong Mayo 9 ang wa mosuporta niya. Kapin 60 percent sa mga nagpakabana sa ilang balaanong katungod sa pagbotar nipili sa iyang mga kaatbang. Hinaot nga may makahunghong nga ang iyang mandato di gikan sa mayoriya ug nga di lisensiya sa paghimo bisan unsay mahunahunaan.
* * *
Samtang kusganon niyang gisaway ang mga eskandalo nga naglambigit sa pipila ka pari, apil nang gipasanginlan nga nanamastamas sa iya pang pagka tinun-an sa Ateneo sa Davao, nganong hilom man sa mas dagkong mga krimen?
Nganong inay sawayon ipalubong man hinuon sa Libingan ng mga Bayani ang patay’ng lawas sa diktador nga si Ferdinand Marcos? Nganong inay tungluhon ang lapad nga pangawat sa niaging pamunoan, gitanyagan man og pardon si kanhi presidente Gloria Arroyo? Way atrasong simbahan ni Duterte. Hinunoa, nagkinahanglan siya sa tabang sa simbahan pagpatuman sa gisaad nga kausaban sa unom ka tuig niyang pamunoan. Daghang mas hawod ug mas bangis nga nisuway pagpukan sa Simbahang Katoliko. Nahibawo tang tanan kinsay nagpabiling nagbarug.