Bisag asa ka ron moadto dako ang kahigayonan nga makasugat ka og bagang duot sa katawhan. Labi na sa mga tindahan, sa mga atanganan og sakyanan sa kadalanan ug bisan sa pipila ka buhatan sa gobyerno. Labing seguro nahiagom na sab sa kahuot sa trapiko, nga hasol nang daan sa wa pay Pasko apan nasamotan pa gyod karong nagkadungan og biyahe ang mas daghang motorista ug pasahero.
Mga timaan nga napagawas nang 13th month pay, Christmas bonus ug ubang mga benepisyo sa mga kawani sa gobyerno ug pribadong mga kompaniya. Nagmatuod sab nga ang kinabag-an karon pa magkarakara sa paghingpit sa ilang mga pangandam sa Pasko ug Bag-ong Tuig.
***
Maong wa katabang ang pagpili sa mga kontraktor ning kataposang mga adlaw nga tingtrabaho sa di pang taas nga bakasyon sa pagtrabaho sa kadalanan duol sa shopping malls. Sama sa nahitabo sa among lungsod sa Consolacion sa amihanang Sugbo.
Giatol gyod sa pagsulbong sa Christmas shoppers niadtong Huwebes ang paglihok sa kabahin sa nasudnong highway sa Laray, Cansaga nga pila lang ka metro gikan sa usa ka shopping mall. Hinaot nga mabadlong sa Department of Public Works and Highways ang ilang kontraktor nga namaregla sa Pasko. Labihang taasa sa linya sa natanggong nga mga sakyanan nga ang tumoy niabot na sa gikaintapan nga eskina Canduman sa Mandaue.
***
Nga, nakatag-an ka, nagpabilin sab nga barado. Bisan sa abundang pagarpar sa pagpahapsay na sa dagan sa mga sakyanan human sa sunudsunod nga mga aksidente nga nikalas og inosenteng mga kinabuhi. Ambot kanus-a pa mataod ang gipasalig nga traffic lights nga gipanghinaot nga mas makahapsay sa pagsawo sa apiking eskina sa mga sakyanan paingon sa tulo ka managlahing direksiyon.
Tungod sa kahuot sa eskina Canduman, labihan na sang taasa sa linya sa nabara nga mga sakyanan nga ang tumoy nilapas na sa utlanan sa Mandaue ug Consolacion. Ambot kanus-a pa tinud-on paglihok. Hangtod sa sunod nga aksidente. Simbako.
***
Tungod sa kataas sa umaabot nga bakasyon, kasagaran sa mga pamilya nagsugod na og mapa asa nila igahin ang giisip nga labing malipayong mga adlaw sa tuig. Ang dagko og puntil mamakasyon sa ubang kanasuran o sa ubang bahin sa nasud. Ang igu-igo lang og tinigom mangaon sa labing lamian nga restaurants. Nagkalainlaing kahugpongan magpasiugda og parties ug reunions.
Di ko mangahas pagsugyot og mga dapit nga labing haom sa kasaulogan. Apan magpakatakos ko pagsugyot sa mga dapit nga angayng likayan. Palihug ayaw pilia ang mga dapit nga maabot lang pinaagi sa pag-uliot sa gubot nga trapiko. Kon di ka ganahan nga ang labing dakong bahin sa imong taas nga bakasyon magasto sa pagsuyop og abog ug aso sa baradong kadalanan.