Di motug-an si Cebu City Mayor Mike Rama sa sunod nilang lakang pagduso sa kontrobersiyal niyang P2.8 bilyones nga Supplemental Budget No. 1 (SB 1) sa Cebu City Council. Igo lang siyang niingon nga mahibaw-an sa mga Sugbuanon ang sunod nilang lakang atol sa regular nga sesyon sa konseho karong adlawa.
Apan wa managana si Rama sa pagtug-an sa mga butang nga di niya himuon:
• Una, di mo-boykot ang mga konsehal sa Team Rama sa mga sesyon sa City Council kay di ni makatabang sa ilang kawsa; ug
• Ikaduha, di mahitabong mosumiter siya og laing supplemental budget nga mas madawat na sa mga konsehal sa Bando Osmeña Pundok Kauswagan.
* * *
Gitubag sang Rama atol sa Arangkada sa DYAB Abante Pa, Bisaya! ang hagit ni Konsehal Jun Gabuya sa mga konsehal sa Team Rama sa pagpasalig nga silay mobayad, kon human maggasto na ang P2.8 bilyones sa SB 1, mahukman sa korte nga ilegal ang pagbaligya sa mga luna sa South Road Properties.
Matod ni Rama andam siyang mohatag sa pasalig nga orihinal nga gipangayo ni kanhi Mayor Tommy Osmeña. Di lang kutob sa sulti. Gitataw ni Rama nga andam siyang mopirma og pormal nga dokumento nga mo-garantiya pagtapal sa kinatibuk-ang gasto sa SB 1 kon mapildeng City Hall sa kiha ni kanhi Cebu City Prosecutor Romulo Torres.
* * *
Usa sa mga sukaranan sa pangisog ni Rama mao ang iyang pagtuo nga huyang ang kaso kay gipasaligan siyang City Legal Officer Jerone Castillo nga wa kamatuod si Torres nga negatibo siyang maapektahan sa pagkahalin sa mga luna sa SRP sa kaso ug wa maklaro unsay nalapad nga balaod.
Matod ni Rama kon nuntan ang katalawan sa mga konsehal sa BOPK mainutil ang City Hall. Kay wa may makapugong ni bisan kinsa, apil nang mga samokan nga way laing lingaw, mahimong ikiha ang tanan nilang lakang ug proyekto. Ug wa na silay laing mahimo gawas sa pagpanubag sa mga kaso.
* * *
Nangangkon si Rama nga ganahan siyang moduwa og chess. Sukad sa gamay pang bata. Nga kon mapilde siya mopauli sa ilang bay ug magsige og tutok sa bungbong, nga morang himuon niyang chess board, pagsubay nganong napilde bisan sa tanang pangandam sa duwa.
Matod niya usa sa batakang lagda sa chess mao ang di pagpahibawo sa imong kaatbang unsay sunod nimong lakang. Wa niya mahisguti ang laing lagda: Nga di maayo nga magsige og tabi samtang magduwa. Sa iyang pagdeklarar nga andam siyang magpapriso kon modaog ang kaso batok sa transaksiyon sa SRP hangtod sa ang-ang sa Korte Suprema, wa ba aksidente nga napalili ni Rama ngadto sa BOPK ang sunod niyang lakang?