Sa tinguha nga makatabang sa Commission on Elections pagpahibawo sa mga botante nga makaapas pa sila sa nahibiling tulo ka semana sa pagpa-rehistro ug pagpa-biometrics aron makabotar sa piniliay sa Mayo sunod tuig, gidasig namo ang mga tigpaminaw ug tigtan-aw sa Arangkada sa DYAB Abante Pa, Bisaya! ug Maayong Buntag, Kapamilya sa ABS-CBN Channel 3 pagpadangat sa ilang mga kalibog ug pangutana.
Nipasalig mi nga paningkamotan ang pagtubag sa ilang mga pangutana. Kon di na ming katubag, magpalaban mi sa kadagkoan sa COMELEC. Wa hinuon mi kaandam sa nag-unang pangutana sa labing daghan nila: Unsaon nila pagparehistro nga wa man silay balido nga identification card?
***
Gilista sa COMELEC ang mga dokumento nga mahimong ipakita sa mga botante aron sila marehistro: Employee's ID, uban ang pirma sa tagduma sa kompaniya; Postal ID; PWD Discount ID; Student's ID o library card, nga gipirmahan sa tagduma sa eskuylahan; Senior Citizen's ID; Driver's license; NBI clearance; Passport; SSS/GSIS ID; Integrated Bar of the Philippines (IBP) ID; Lisensiya nga giluwatan sa Professional Regulation Commission; Certificate of Confirmation nga giluwatan sa National Commission on Indigenous Peoples; ug uban pang balidong ID.
Kon wa gyoy ID, ang aplikante mahimong ilhon sa affidavit nga may notaryo sa rehistradong botante sa presinto diin siya magparehistro, o sa iyang paryente. Ang Community Tax Certificates (cedula) ug PNP clearance di ilhon nga balidong ID alang sa rehistrasyon sa mga botante.
***
Kon mao nga daghan pang way balidong ID, nakahukom mi sa pagbukas sa publiko sa among gipasiugdahan sud sa ABS-CBN nga tiningob nga pagkuha og Unified Multi-Purpose ID, nga mahimong makuha sa mga sakop sa SSS, GSIS, Pag-IBIG ug PhilHealth, alang sa mga kawani sa among mga sibyaanan.
Nisugot ang SSS nga sa ABS-CBN Broadcast Complex hikayon ang among aplikasyon ubos sa kundisyon nga makaabot mi og gatos. Di tingali mobalibad ang SSS kon mas daghan ang makapahimus sa ilang serbisyo.
***
Mas sayon kon imong i-download ang UMID application form gikan sa websites sa Social Security System (https://www.sss.gov.ph/) kon kawani ka og pribadong kompaniyao sa Government Service Insurance System (http://www.gsis.gov.ph/) kon kawani ka sa gobyerno. Palihug isuwat ang tanang gipangayo nga kasayuran ginamit ang giya ubos nga bahin sa porma.
Isumiter sa ABS-CBN (pangitaa si Cheryll Barrios-Verdijo, among Administrative Assistant) ang application form uban ang, nakatag-an ka, duha ka balidong IDs. Sublion sa SSS ang mga dokumento aron masusi wa na bay kuwang una pa motakda og petsa sa aktuwal nga paghikay sa UMID IDs. Paningkamotan namo paghipos ang tanang panginahanglan sa di pang sunod nga Grand Halad sa Kapamilya karong Nobyembre 21.