Wa isalikway nilang Senador Grace Poe ug Senador Chiz Escudero ang kahigayonan nga mopaluyo sila og lokal nga mga kandidato sa mga dakbayan ug kalungsoran ug sa Kapitolyo sa Sugbo piniliay sa Mayo sunod tuig. Wa silay partido apan andam silang makig-alyansa sa politikanhong mga grupo nga susama nila og mga prinsipyo ug mga panglantaw. Matod ni Escudero mag-agad hinuon ang ilang suporta sa kalidad sa indibiduwal nga mga kandidato sa lokal nga mga posisyon.
Gipasabot ni Escudero nga di na sila kinahanglan nga magtukod og lokal nga organisasyon nga mosagakay sa ilang kampanya. Nisalig sila sa kaligdong sa mga botante, labi na sa mga batan-on, nga maoy mopalambo sa ilang kandidatura.
* * *
Sa ilang pagtambong sa Arangkada sa DYAB Abante Pa, Bisaya! gahapon sa buntag, naklaro nga si Escudero ang nagduma sa politikanhong aspeto sa ilang kampanya. Nabantang sab nga hingpit ang pagsalig ni Poe niya.
Nipasalig si Escudero nga way sukaranan ang mga pasidaan nga mahimong masakripisyo ang ilang politikanhong mga interes kon way partido, kay wa silay kopya sa election returns (ERs) ug certificates of canvass nga makatabang pagbadlong sa bisan unsang kahiwian sa piniliay. Matod ni Escudero lahi sa karaang mga piniliay, nga unom ra ka carbon copies ang gipanghatag, karon may 32 ka digital copies sa ERs ug CoCs ug busa sayon ra silang makakuha.
* * *
Nikomedya si Poe nga hangtod karon wa pay partido nga nipadayag og suporta nila. Gawas sa Makabayan bloc kansang usa sa mga haligi nga si Kongresista Neri Colmenares maoy nahimong labing una nilang kandidato pagka senador.
Apan ang kadagkoan sa Nationalist People's Coalition nitataw nga pormalidad na lay kuwang sa ilang pagsagop nilang Poe ug Escudero. Gawas nga may mga lider sa Liberal Party nga nibalitok na nila. Matod ni Escudero mahimong saw-an lang nila ang mga kopya sa ERs ug CoCs sa alyado nilang mga partido.
* * *
Karon pa lang may mga linya na silang Poe ug Escudero nga klarong gisigehan na nila og ensayo ug gipaabot nga mapun-an pa sa umaabot nga mga adlaw ug nagmatuod sa talagsaon nilang kasuod ug gipanghinaot nga epektibong panagang sa labing seryusong mga pasangil batok nila:
• Sa pasangil nga si Escudero ang labing bug-at nga bagahe sa iyang kampanya, si Poe mopasalig nga, "Si Senator Chiz ay matalino…" mosal-ot si Escudero nga, "At may mukha…" apan magkatawa nga moinsistir si Poe nga, "Si Senator Chiz ay matalino."
• Sa pasangil nga si Poe di natural born Filipino citizen, may andam nang panagang si Escudero: Kadudahan lang ang iyang pagka Pilipino kon 5'11" pa ang gitas-on ni Poe. Dayon, sikhon siya ni Poe ug mangatawa silang duha.