Sunod nimong sakay og taxi ug makasimhot og baho sa liquified petroleum gas, mosugyot ming himuon nimo ning mosunod:
• Pasalamat nga pila ra ka ka gutlo o kapin ra sa oras, depende sa imong ruta ug sa kahuot sa trapiko, nga mag-antos sa baho;
• Pangaliya alang sa taxi drivers kay 12 ngadto sa 24 ka takna silang magsingo sa makahilo nga kemikal; ug
• Tulisoka ang kapakyas sa gobyerno sa pagtarung pagpatuman sa conversion sa mga taxi gikan sa krudo ug gasolina ngadto sa Automotive LPG nga samtang gitumong unta pagpadako sa kinitaan sa mga drayber ug pagpanalipod sa kinaiyahan gilaktod sa pagpatuman ug karon gikabalak-an nga nahimong hulga sa kahimsog sa publiko.
***
Nahugno mi sa gipahibawo ni Regional Director Reynaldo Elnar sa Land Transportation Franchising and Regulatory Board sa Central Visayas mahitungod sa kapakyas nila pagsuperbisar sa conversion sa taxi units dinhi sa ato:
• Kon accredited ang kompaniya nga mohimo sa conversion, di na inspeksiyunon sa LTFRB;
• Usa ray accredited sa Sugbo apan wa siyay laing nahibaw-an kay ilang ulohang buhatan ray nanghatag og accreditation;
• Bisan di accredited ang mo-convert sa taxi units di kabaraw ang LTFRB kon di mopahibawo ang taxi operators nila; ug
• Karon pa nila susihon giunsa pagpatuman ang conversion human nakadawat sa reklamo sa taxi drivers pinaagi sa DYAB Radyo Patrol.
***
Ang Department of Science and Technology gyod unta ang labing takos nga moduma sa conversion sa taxi units gikan sa paggamit sa krudo o gasolina ngadto sa Auto-LPG, di ang LTFRB, ni ang Department of Trade and Industry. Gani ang DOST maoy gitahasan pagtuon sa epekto sa puwersa sa mga sakyanan sa unang mga adlaw sa paggamit sa Auto-LPG.
Nahibung si Regional Director Edilberto Paradela sa DOST 7 nganong wa na sila paapila sa pagsuperbisar sa conversion. Andam siyang motabang apan niangkon nga kinahanglan pang mamalit sa kahimanan pagtino sa kaluwas sa converted nga taxi units.
***
Sa iyang bahin, magpakisayod si Regional Director Jaime Bernadas sa Department of Health (DOH) sa Central Visayas sa ilang ulohang buhatan may kahimanan ba silang maggamit sa pagsusi sa reklamo sa taxi drivers nga nangaluya sila ug dali rang nangasakit sukad naggamit og Auto-LPG.
Matod ni Bernadas wa pang kadawat og reklamo ang iyang buhatan sa daotang epekto sa Auto-LPG ngadto sa panglawas sa mga drayber ug mga pasahero. Apan tungod sa kumpisal sa LTFRB nga wa sila magbantay sa aktuwal nga conversion sa taxi units ug sa taxi operators nga wa mabantog nga matinumanon sa mga lagda, manguros na lang tang daan nga posibleng may sukaranan ang kabalaka ug mahimo ganing may nangasakit na sa taxi drivers ug mga pasahero.