Giawhag silang Cebu Archbishop Jose Palma ug ubang kadagkoan sa Simbahang Katoliko sa pagsubli sa ilang gilusad nga Piso Para sa Misa ng Mundo (PPMM) pangandam sa International Eucharistic Congress (IEC) nga himuon sa Dakbayan sa Sugbo karong Enero 2016. Kini tungod sa kabalaka nga mabarato ang IEC kay gibutangan og presyo ang kalibutanong kalihokan.
Ang awhag giluwatan ni Padre Francisco "Paking" Silva, kanhi administrador sa National Electrification Administration. Kahibawo si Padre Paking sa iyang gipanulti. Kay sa seminarista pa nagsige na siya og kuwestiyon sa pagpaningil og bayranan sa mga pangalagad sa simbahan.
***
Nahimong mas makahuloganon ang awhag ni Padre Paking kay nakaangkon siya karong bag-ong bag-o og kinakusgan nga alyado. Si Pope Francis maoy labing uwahing nisaway sa pagtakda sa kaparian ug mga layko og presyo sa nagkalainlaing mga sakramento sa simbahan, sama sa bunyag, kasal ug mga intensiyon sa misa.
Ambot niabot na ba sa atensiyon sa Vatican ang PPMM sa Artsidyosesis sa Sugbo ug sa Catholic Bishops Conference of the Philippines (CBCP). Kun mahibaw-an sa Santo Papa, angay’ng manguros na lang daan ang mga tigpasiugda. Di gyud mahitabo nga dasonan ni Pope Francis ang iyang giisip nga dakong eskandalo sa Simbahang Katoliko nga lisod mapasaylo sa katawhan.
***
Nipasabot si Pope Francis nga ang panguwarta sa simbahan maoy nakapaulbo sa kasuko ni Hesukristo. Ang iyang wali nga nakapakugang sa ubang kadagkoan sa simbahan nanukad sa Ebanghelyo ni Lucas sa pagtuwad ni Hesukristo sa mga lamesa ug pagpalayas sa mga mamaligyaay gikan sa templo kay ang balaanong dapit alang sa pangaliya ug di sa negosyo.
Matod ni Pope Francis nabalaka si Hesukristo nga ang paggamit sa simbahan alang sa negosyo maka-mantsa sa iyang gamhanang mensahe sa kaluwasan. Kay ang kinabuhing dayon usa ka balaanong gasa, hingpit nga libre, mahimong makab-ot sa tanan ug wa’y bisan usa ka dako nga bayranan.
***
Di ni unang higayon nga gisupak ni Pope Francis ang mga aransel sa simbahan. Dihang bag-o pa siyang naordinahan pagka pari sa Argentina kusganon niyang gisaway ang ubang kaparian sa parokya nga nibalibad sa pagsaulog og misa alang sa magtiayon nga nagpakasal tungod lang kay wa nay ikabayad sa dugang oras sa ilang paggamit sa simbahan.
Lima ka dekada ang nilabay, gikanselar ni Padre Paking ang aransel sa iyang giduma nga parokya sa Moalboal. Gipasabot ang mga parokyano nga ang ilang hinabang maoy makapabuhi sa simbahan. Gipamatud-an niya nga bisan way aransel mas nidako ang kita sa parokya. Inay pasidunggan sa iyang mga labaw, wa na siya hatagi og laing parokya. Ubos sa liderato ni Pope Francis, mahimong makaangkon na og mas makiangayon nga pagtagad ang mga pari nga susama ni Padre Paking.