Pope Francis Boot Camp Academy, Carcar City -- Dihang seminarista pa siya, si Padre Francisco "Paking" Silva nangutana sa iyang mga magtutudlo di ba masaypan nga nagnegosyo ang Simbahang Katoliko sa pagtakda sa bayranan sa mga sakramento sama sa bunyag, kasal ug lubong? Di ba mahimong tangtangon ang aransel ug pasabton ang mga parokyano sa kamahinungdanon sa ilang tampo pagpalambo sa simbahan ug sa pagtuo?
Gipakaingon sa iyang mga magtutudlo ug kaubanang seminarista nga nanguryuso lang si Padre Paking. Nga igo lang niyang gihagit ang mga magtutudlo aron mas mapasabot nila ang mga lagda ug mga pagtulon-an sa simbahan. Nasayop sila. Determinado si Padre Paking pag-usab sa iyang giisip nga sayop nga mga palakaw sa simbahan.
***
Dihang nadestino isip luyuluyong kura sa Parokya sa San Nicolas sa Dakbayan sa Sugbo, gisugo si Padre Paking sa iyang kura sa pagpang-responso sa mga lubong sa minteryo sa Calamba.
Naikog nga mobalibad si Padre Paking kay 75 anyos na ang iyang kura apan nisugot ubos sa kundisyon nga di siya mangolekta og bayad sa responso. Inay makiglalis sa iyang batan-ong kaabag, nakakita ang kura og laing pari nga nisugot paghimo ug pagpangolekta og bayad sa responso.
***
Nakahigayon si Padre Paking pagpatuman sa iyang sugyot nga di butangan og price tag ang balaanong mga sakramento sa simbahan dihang natudlo siyang kura paruko sa Moalboal sa habagatan kasadpang Sugbo. Wa nay nibaraw niya dihang gikanselar ang mga bayranan sa responso, kasal ug bunyag.
Gipasabot ni Padre Paking ang mga parokyano sa Moalboal nga nagkinahanglan ang simbahan sa ilang tampo. Nga di mobarug ang ilang parokya kon di sila motabang sa inadlawng mga panginahanglan sa simbahan, sa kaparian ug sa artsidyosesis ug sa Vatican. Malipayong nitaho si Padre Paking sa kadagkoan sa simbahan nga, human niya gikanselar ang aransel, nidako hinuon ang kinatibuk-ang kita sa parokya sa Moalboal.
***
Ang ganti ni Padre Paking sa kalamposan sa gipasiugdahan nga kausaban? Wa na siya itudlo og laing parokya. May ubang mga pari nga nipaluyo sa iyang kausaban. Hasta sila, nangamatay na lang ang pipila, wa sab hatagi og kahigayonan nga makaduma og mga parokya.
Inay maluya, nagpadayon si Padre Paking sa iyang kampanya sa kausaban. Ang kadaogan sa Moalboal gidasonan sa mas lapad niyang kalamposan pagduma sa Cebu Electric Cooperative ug National Electrification Administration. Labing uwahi niyang gikuwestiyon mao ang kampanyang "Piso Para sa Misa ng Mundo" para sa gasto sa pagduaw ni Pope Francis sa Pilipinas sa Enero sunod tuig. Masaligon siyang motabang ang katawhan sa way pagbutang og presyo sa pagduaw sa Santo Papa. (Gitukod ni Padre Paking ning boot camp para sa mga bansaybansay ginamit ang mga pagtulon-an sa liderato ni Pope Francis ug sa abunda nilang kasinatian sa CEBECO). leo_lastimosa@abs-cbn.com