Ang napatay nga hepe sa kapolisan sa lungsod sa Alcoy gikataho nga nakig-inom pa sa konsehal sa barangay nga mipusil kaniya sa wala pa ang hitabo kaniadtong Domingo sa gabii.
Bisan si Alcoy Mayor Nick De Los Santos wala makagusto nga nagtan-aw nga si Inspector Crisanto Abella nakig-inom uban ni Konsehal Ciriaco De Los Santos nga dayag kaayo sa mga tawo.
Adunay gipahigayon nga boksing sulod sa Sports Complex sa Barangay Poblacion, Alcoy ug mao nga adunay mga polis nga gidestino aron pagpatunhay sa kahusay ug kalinaw.
Apan ambot ngano nga si Inspector Abella natental man ug misalmot sa pakig-inom ngadto sa konsehal sa barangay nga usa ka retirado'ng polis.
Nagkalalis sila ug ambot unsay ilang gilalisan, gipusil sa barangay konsehal ang hepe sa polis ginamit ang .45 kalibre nga pistola. Human niya'g pusil, si Ciriaco mikuha sa .9 millimeter pistol sa polis ug gidala sa pag-ikyas.
Apan kay duna man dayo'y mga polis nga migukod kaniya, si Ciriaco napugos sa pagtago sa usa ka payag nga duwaanan og mahjong. Gipusil pa niya ang mga polis, maayo kay walay naigo.
Human makumbinsir nga motahan na lang, si Ciriaco miapil sa pagtugyan sa iyang .45 kalibre nga pistola. Dili kuno siya ang nagpusil sa hepe sa polis.
Buot niya nga ipatuo nga samtang sila nag-inom, dunay laing tawo nga maoy mipusil ug mipatay sa hepe. Apan dili magsilbe ang iyang katarongan kay may mga polis nga nakakita.
Ikaduha nga rason, ang .9 mm nga pistola nga iya sa polis didto makit-i sa dapit nga gitagoan sa konsehal sa barangay. Ang pangutana karon, lisensyado kaha ang armas nga .45 kalibre ni Konsehal De Los Santos?
Kon dili man gani lisensyado, mosamot kadako ang atubangon nga kaso sa konsehal sa barangay.
Ang leksyon nga makuha niini nga kaso mao nga kon polis ka gani, ilabi na og anaa mo sa usa ka dapit aron sa pagpatunhay sa kahusay ug kalinaw, ayaw mo pag-inom og makahubog.
Salawayon kaayo kana sa mga mata sa katawhan nga makakita kaninyo.
* * *
Dia pa'y laing naleksyon - si PDEA acting regional director Esperidion Javier. Unom ka buwan nga pagkasuspenso maoy gipahamtang nga silot ngadto ni Javier tungod sa paghagit og pinusilay sa usa ka radio reporter.
Hinuon, nangayo na man og pasaylo si Javier ngadto ni reporter Guamitos Logroño sa GMA-7. Wala g'yud moawop ang tinguha ni Logroño nga kasilotan ang opisyal sa PDEA nga nanghagit niya'g pinusilay.
Unsaon tawon pakigpinusilay ni Guam nga wala man intawon na'y armas. Ang gihimo ni Guam mao ra man unta ang pag-interview ni Javier kabahin sa kontrobersiya nga naglambigit ang PDEA, apan nasuko man hinuon.
Sayop g'yud nimo sir Javier. Alang kaninyo'ng mga opisyal sa kagamhanan, kon malambigit gani og kontrobersiya ang inyong gidumala nga mga opisina, o kamo mismo, ayaw kasuko sa mga sakop sa media, ilabi na ang mga reporter.
Sa ako hinuon nga pagka reporter kaniadto diha sa polis ug militar, wala man g'yud ko kasuk-i ug hagita'g pinusilay.
* * *
Hilabihan kaluoy sa taga Tuburan. Menos tawon kaayo ang mga sakyanan nga ilang kasakyan gikan sa ilang dapit paingon dinhi sa dakbayan. Ang Corominas ra man kuno maoy nagbiyahe didto.
Kamo diha sa LTFRB, palihog kuno, sulbara ang problema sa taga Tuburan nga usahay moabot intawon og tulo ka oras ang ilang pagpinaabot aron makasakay. Sa ato pa, pagsugod nila og paabot, ang sakyanan dia pa dinhi sa siyudad.