Wala na gyud ko makaagwanta sa pagpasagad sa kontraktor nga gitahasan sa Department of Public Works and Highways pag-aspalto sa Gorordo Avenue lahos na sa Veterans Drive paingon sa Barangay Busay.
Matud pa sa panultihon, "Kun dili ako ang mohimo'g pakisusi kinsa man? Kun dili nako buhaton karon, kanus-a pa man?" Anaa man gud ko mag-agian diha sa mao nga karsada ug mao nga magkagot ang akong bag-ang nga magsud-ong nianang proyekto nga gibiyaan ra sa kontraktor.
Base sa karatola nga gipahimutang sa tiilan sa Gorordo Avenue atubangan sa Colegio dela Inmaculada Concepcion, ang Ven Ray Construction maoy nakakuha sa P33.9 milyones nga road asphalting project sa tibuok Gorordo Ave.
Sa ato pa, ang mao nga construction company maoy nagpabaya sa ilang katungdanan kay ang Gorordo Avenue atubangan nga bahin sa University of the Philippines paingon na sa unahan sa Lahug Elementary School giguba nila apan wala dayon aspaltoha.
Hapit na duha ka semana nga wala baliki sa pagtrabaho ang mao nga karsada. Ang akong nalibgan kun ngano nga ang mga opisyal sa DPWH-7 Regional Office wala man magtagad niining palpak sa ilang gikuha nga kontraktor?
Unsa man na'ng inyo, tinud-anay'ng serbisyo alang sa publiko o pang-komisyon? Wala g'yud ninyo "madukol" ang ulo niining mga kontraktor nga wala gani moduol sa media aron mapasabot nila ang publiko nganong naingon niana ang ilang proyekto?
Aduna silay dako kaayong tubagonon sa publiko tungod kay ang proyekto gigastohan kini sa kuwarta gikan sa buhis sa katawhan. Unsa ba'y gihimo sa hepe sa DPWH Construction Division? Nabuta ba kamo nga wala makakita sa kahasol nga gihimo sa inyo'ng gikuha nga kontraktor?
Sa tungasan nga bahin Veterans Drive, kana'ng karsada patungas na paingon sa Marco Polo Hotel gikan sa eskena Salinas Drive ug Gorordo Avenue, mga usa ka semana na usab nga gibiyaan ang gikaskas nga karsada.
Kini nga kontraktor naghatag usab og sakripisyo sa mga motorista diha'ng gibiyaan nila ang ilang gikaskas nga karsada duol sa Marco Polo. Kini'ng duha ka construction company walay maayo nga agi sa pag-aspalto.
Tungod nga bahin sa Marco Polo Hotel, wala magtupong ang giaspalto nga bahin sa karsada. Gani, kaniadtong miagi'ng semana diha'y amahan ug anak nga nagsakay og motorsiklo maayo'ng pagkabagnos kay nadakin-as tungod sa binuang nga pag-aspalto.
Kamong mga inspector sa DPWH kun maayo pa kamo'g panan-aw, susiha ninyo pag-ayo kun giunsa pag-aspalto ang karsada. Malagmit ra ba nga mopirma lang dayon mo kun itugyan na ang project.
Daghan nga bahin sa karsada nga kunohay human na ang pag-aspalto apan aduna'y nagbugdo. Tan-awa atubangan niana'ng dako'ng restaurant sa Gorordo Avenue duol sa eskena paingon sa Perpetual Soccour Hospital.
Klaro kaayo nga wala mahuman sa pag-aspalto apan gibiyaan. Nagtoo ko nga ang uban nga bahin sa karsada pun-anan pa ang pagbutang og aspalto. Ang eskena Escario ug Gorordo Avenue wala giaspalto.
Sa laktod, mora'g ang naghimo sa pag-aspalto mao ang kontraktor nga nagpraktis pa sa pagtrabaho. Ayoha 'sab tawon na pagtrabaho ang inyong proyekto uy taga Ven Ray Construction.
Unya, kamo diha sa DPWH-7 Regional Office, inyo man diay kini nga project, i-monitor kanunay ang proyekto dili kay pasagdan ra ninyo ang kontraktor sa pagsakripisyo sa mga motorista.
Angay unta nga si Mayor Michael Rama kay siya man maoy amahan dinhi sa dakbayan mangusog gyud niini nga isyu, dili kay igo lang moingon nga iyang pakigtagboan ang mga hingtungdan nga kontraktor apan wala diay.
Makatugot ka lang ba Mayor Mike nga madisgrasya ug mahasol ang katawhan tungod sa tinonto sa mga kontraktor nga gikuha sa DPWH? Kun moingon sila nga nagkuwang ang aspalto, bi ngano'ng giuna man nila ang pagguba sa karsada?
Ang tukma unta mao nga anam-anam lang dili kay kaskason nila ang karsada og taas kaayo unya biyaan lang nga wala gani mohimo'g pagpasabot sa publiko ngano nga naingon niini ang ilang proyekto.
Naghalhal lang mo? Maayo lang pakungon nang inyong mga ulo ug sa ulo sa mga opisyal sa DPWH nga wala magtagad niining mao nga problema.