Karong paskoha maoy labing malipayong pasko alang kanako bisan og walay nanghatag kanako og daghang pinaskohan.
Abi ninyo og ngano? Gikakita ko ang akong higala nga si retired police officer Samson Dasoc og iya ko nga gihatagan og gamay nga bronze image sa akong pinangga nga si Señor Santo Niño.
Maabot nako ang pagpalit sa mao nga bronze image, apan matud pa sa uban nga mas nindot g'yud kon ang imahe hinatag.
Kagahapon, nagkakita kami ni Sam atul sa kalihukan pagsaulog sa 117th death anniversary ni Dr. Jose Rizal og gihatag niya kanako ang maong nga gift nga gisulod og nipis kaayo nga panapton.
Daw naglumpayat ko sa kalipay nga nakadawat niini nga gift og gigakus nako sa kahinangop ang akong higala. Mas bililhon pa kanako ang mao nga gift kay sa pipila ka case nga beer, softdrinks ug ubang mga gifts.
Daghan kaayo nga tabang ang akong nadawat gikan ni Santo Niño mao nga nagpabilin ko nga buhi pa hangtud karon. Sa ako na nga giingon kaninyo, patay na unta ko kon wala pa ko tabangi ni Santo Niño.
Akong nasagubang ang grabe nga kalisod sa panginabuhi tungod sa pagtabang ni Santo Niño. Gikan karon, ang mao nga imahen ni Santo Niño mao na'y akong kanunay'ng kauban.
Saludo ko sa akong higala nga si Sam Dasoc kay wala gayud makalimot kanako atul niining pagsaulog nato sa pasko.
* * *
Maayo unta og mapangitaan og paagi sa kadagkoan sa Basilica del Santo Niño nga dili kaayo motaas ang linya sa mga tawo nga moyukbo sa imahen sa balaang bata.
Karon gud, gisirad-an pa ang ampoanan atubangan sa Santo Niño Chapel mao nga makakita ka lang sa imahen kon motuyok agi sa luyo sa kapilya. Tungod sa kadaghan sa mga moyukbo ni Santo Niño, taas kaayo ang kutay sa mga tawo.
Mosamot kini karong magkaduol na ang kapistahan ni Santo Niño. Palihog pangita mo'g paagi. Basin mahimo ra nga buksan ang atubangan nga bahin sa kapilya.