Ato ning klaruhon. Klarong nakabayad si Manny Pacquiao sa dagkong buhis sa lima niya ka sangka nga pulos daog sa Las Vegas sa mga tuig 2008 ug 2009. Kay kon wa pa hagbay ra siyang giposasan sa Estados Unidos. Maong di makiangayon ang pagpasangil niya nga utangan og P2.2 bilyones nga buhis.
Sa pikas nga bahin, sakto ang Bureau of Internal Revenue sa pagpaningil og buhis ni Pacquiao sa dagko niyang kinitaan. Kon nakabayad na og buhis si Pacquiao sa Estados Unidos di na siya kakolektahan og buhis sa BIR. Apan katungod sa BIR ang pagpangita og dokumento nga momatuod nga nakabayad na si Pacquiao sa Internal Revenue Service.
***
Niinsistir si Pacquiao nga may mga dokumento siya nga magmatuod nga nadawat na sa IRS ang dagko niyang bayad sa buhis. Apan ang nadawat ni BIR Commissioner Kim Henares mao ra ang suwat ni Bob Arum, chief executive officer sa Top Rank, nga nipasalig nga na-remit na nila sa IRS ang buhis ni Pacquiao.
Di na angayng duhigon si Pacquiao sa komplikasyon sa mga dokumento. May mga gisuholan siya sa paghikay sa tanang papel sa mga transaksiyon nga iyang gisudlan, apil nang mga buhis nga iyang gibayran. Apil sa iyang mga sinuholan silang Arum ug iyang accountants ug mga abogado.
***
Duha na ka tuig nga nangita ang BIR sa mga dokumento sa mga buhis nga gibayran ni Pacquiao sa Estados Unidos. Hangtod karon way napakita silang Arum, iyang accountants ug mga abogado. Bugtong nilang nahimo mao rang pag-timing sa pagbisto sa kaso usa ka adlaw human sa kadaogan ni Pacquiao batok ni Bam Bam Rios sa Macau, China.
May gahom ang BIR pagpaningil sa buhis nga wa pa kapamatud-i nga nabayran nang Pacquiao. Di sila kinahanglang mananghid sa Court of Tax Appeals. May gahom hinuong CTA pagpugong sa BIR. Nga wa mahitabo, salamat sa nauwahing petisyon sa mga abogado ni Pacquiao.
***
Labing makapakugang nga kasayuran nga nitumaw ning kontrobersiya: P1.1 milyones na lang ang nahibiling kuwarta ni Pacquiao sa mga bangko busa mao ray napugngan sa BIR. Mahimong namakak ang mga bangko nga gisuwatan sa BIR. O nagsulti sa tinuod si Rex Wakee Salud nga wa nay kuwarta si Pacquiao.
Nahigot ba lang ang binilyon ka pesos niyang katigayonan sa mga patigayon ug ubang kabtangan? O nahurot nang tanang hiniposan sa nagbuntaog nga mga pilde sa wa pa mabadlong apan gitagoan na lang kay mosukwahi sa gipatuo nga pagsagop na niya og relihiyusong kinabuhi niyang pagpanugal ug ubang mga bisyo? Ug sa way kinutobang pagsabod og kuwarta sa mga pastor, politiko ug ubang sipsip niya, apil nang Arum ug iyang accountants ug mga abogado?
***
Emai: leo_lastimosa@abs-cbn.com