Kami'ng mga reporters nga nadestino sa Cebu City Hall giingnan nga paadtoon sa Sitio Huyong-Huyong sakop sa Barangay Mambaling, ang dapit diin 68 ka balay ang nasunog sa miaging Dominggo, kay adto kuno magpa-presscon ang mayor.
Gipasakay mi'g coaster sa City Hall ug pagsulod namo sa mao nga lugar, komon kaayo ang mga talan-awon. Gagmay nga karsada tungod sa mga illegal structures ug mga tindahan nga anaa daplin sa karsada gitukod.
Misugat sa among panan-aw ang nagliundok nga mga lapok nga gipahimutang daplin sa karsada nga gihukad sa mga kawani sa City Hall gikan sa kanal. Apil sa mga hugaw mga botelya sa softdrinks, botelya sa patis, mga kahoy ug ubang matang sa mga sagbot.
Nakaingon ko nga kon wala pa masunog ang maong dapit walay pagpanglimpyo sa drainage systems sa mao nga lugar? Unya nganong ang mga botelya gipanglabay ra man sa kanal? Unsa may gihimo sa kapitan sa Mambaling?
Kining problemaha, nasinati usab sa ubang kabarangayan kay unsaon ang mga opisyal sa barangay agap man kaayo sila og pwesto nga magpabilin sila sa katungdanan ug mahadlok nga mapilde mao nga bisan makakita nga adunay gihimo nga dili tukma ang katawhan molingiw lang.
Ambot, napikal na tingali nako si Raquel Arce, hepe sa PROBE, kay daghan man kaayo ko og gireport nga mga binuang nga ang karsada gigamit na nga kabahin sa ilang balay o kaha gibutangan og tindahan.
Sagad sa problema kabahin sa pag-ukopar sa mga luna nga alang na unta sa publiko, makita g'yud kanunay. Pagkanindot kon tumanon ni Mayor Michael Rama ang kanunay niya balik-balikon nga tul-iron ang hiwi ug panggub-on kining mga “obstacles†sa daplin sa karsada.
Sa matag hisgot nako niining maong isyu mokalit lang nga mahinumdom dayon ko ni kanhi Metro Manila Development Authority (MMDA) Chairman Bayani Fernando nga kusog kaayo mangguba sa mga illegal structure nga gitukod diha sa mga aseras ug daplin sa mga karsada.
* * *
Tingali daghang opisyal sa kabarangayan nga nakaamgo na nga imposible na sila nga makadaug pag-usab puwerte tingali nga ampo nga dili g'yud madayon ang eleksyon sa barangay karong Oktobre.
Unya, kadtong mga tawo nga tag-as kaayo og ambisyon, nag-ampo 'sab nga idayon g'yud sa Commission on Elections ang pagpahigayon sa barangay elections kay aron sila makalansar.
Apan sa ako na nga gibalik-balik sa pag-ingon nga ang nindot nga himoong opisyal mao kadtong mga tawo nga wala na mangandoy nga mapili sila pag-usab sa sunod nga eleksyon.
Kay kon ang usa ka opisyal gud may kahakog pa sa katungdanan sa kagamhanan mohimo g'yud siya og nga paagi aron nga “humot†siya kanunay sa mga tawo aron dili siya isalikway sa eleksyon.
Apan kon ang tawo maghunahuna lang nga moserbisyo sa usa ka termino ug iyang ipakita kon unsa ang tinuoray nga pagserbisyo, himoon gayud niya kon unsay husto bahala na ug daghan sa mga tawo nga mipili kaniya maapektahan.
Naa kaha ta niining mga tawhana?
* * *
Pagkapaspas gayud sa pagligid sa panahon. Dili na lang nako itug-an kon pila na ko ka tuig sa pagtrabaho sa The Freeman. Wala gayud ko motinguha nga mobalhin pagtrabaho sa laing mga newspaper sama sa gihimo sa uban nako nga mga kauban kaniadto.
Karong Hulyo 18, ang The Freeman magsaulog sa iyang ika-94 nga anibersaryo ug kadtong nakaserbisyo og dugay sa kompaniya pasidunggan. Pasalamat ko sa tagdumala sa among kompaniya kay sa tanang reporters ako ra ang gihatagan og higayon nga makasuwat og lindog.
* * *
Congrats diay ni Ruben Almendras, kanhi maglilindog sa The Freeman ug manager sa Metro Cebu Water District (MCWD) kay siya maoy itudlo ni Mayor Michael Rama nga tsirman sa City Traffic Operations Management (CITOM).
Dako hinoon kaayo ang hagit nga nagpaabot ni Almendras sa pagpalambo sa serbisyo sa mga sakop sa CITOM ug ang pagpatuman og pamaagi aron mohapsay ang trapiko sa dakbayan.