Ang Bureau of Internal Revenue (BIR) niluwat sa kontrobersiyal nga Revenue Regulations No. 18-2012 (BIR RR 18-2012), nga maoy responsable sa tanang kaguliyang sa pagpatuman sa bag-ong mga resibo, niadtong Disyembre 28, 2012. Way bisan usang nahibawo sa kamandoan niadtong adlawa. Kay gawas nga tungatunga sa taas nga mga bakasyon sa Pasko ug Bag-ong Tuig, wa mopatawag og press conference ang BIR. Ni moluwat og bisan unsang press conference.
Bugtong gikinahanglan aron nga ang bag-ong lagda ikapatuman mao ang pagmantala sa BIR RR 18-2012 sa publikasyon nga mabasa sa tibuok nasud. Maong gimantala sa BIR niadtong Enero 3, 2013 sa nasudnong pamantalaan nga mas nadungog sa iyang mga pahibawo sa inila nga mga nangamatay.
***
Maong di ikahibung nga mas unang nahibawo sa bag-ong lagda ang mga tigpalit og buwad sa Taboan. Kon natsambahan nga wa magisi ni mangalisbo pag-ayo ang putos sa ilang pinalit ug aksidenteng nahikyad ug nalilian ang mga probisyon, mas suhito sila kay sa mga negosyante ug ubang mga magbubuhis sa katuyoan sa BIR RR 18-2012:
Pagmando sa hingpit nga automation sa aplikasyon, generation, pag-aprobar ug pagluwat sa Authority to Print (ATP) sa Official Receipts (ORs), Sales Invoices (SIs) ug ubang Commercial Invoices (CIs) pinaagi sa Internet, labi na sa OnLine ATP system sa BIR. Ang BIR RR No. 18-2012 nipahamtang sab og dugang panginahanglan sa pagpatik sa ORs, SIs ug ubang CIs.
***
Mao ni sinugdanan sa higanteng bulilyaso. Nipatuman ang BIR og dakong kausaban sa sistema sa pagpatik sa opisyal nga mga resibo ug nagtuo nga magkarakara ang mga magbubuhis sa pagsanong sa kausaban. Hinikalimtan ang batakang panginahanglan sa epektibong pagpatuman sa bisan unsang bag-ong lagda: Pagpahibawo ug pagpasabot sa mga hingtungdan.
Wa hinuon mag-inusara ang BIR sa pagpabilin sa langob ni Mampor--nga “publications of national circulation†ray bugtong paagi sa pagpahibawo sa bag-ong mga lagda. Hinaot ang mga buhatan sa gobyerno ug bisan sa pribadong sektor makamata na sa kamatuoran nga wa pay radyo, ni telebisyon ug internet dihang naumol ang nanggungis nang lagda sa publikasyon.
***
Nataligam-an sab sa BIR pagpangutana ang ilang kaugalingon takos ba silang mopatuman sa kausaban sud sa lugway nga ilang gitakda? Bisan nahibawo pa dayon ang tanang negosyante ug mga propesyonal sa pagkaumol sa mga lagda unom ka buwan ang nilabay matanggong lang gihapon ang ilang mga aplikasyon pagprinta og bag-ong mga resibo tungod sa kakuwang sa mga kawani sa BIR.
Nagbuntaog rong mga aplikasyon sa mga buhatan sa BIR nga way paglaom nga mahikay hangtod sa kataposan ning buwana, ang gitakdang deadline. Mga negosyante ug mga propesyonal ba gihapoy tulisukon kon way bag-ong mga resibo nga mahatag sa ilang mga kustomer sunod buwan tungod sa kapulpol sa BIR?
***
Email: leo_lastimosa@abs-cbn.com