Ang kinaham nga tubag ni suspended governor Gwen Garcia sa tanang pasangil sa kahiwian ug sa ka way kapuslanan sa Cebu International Convention Center (CICC) mao nga kon wa pa ni tukora asa man magtigom ang mga pangu sa kanasuran nga nitambong sa Asean Summit dinhi sa Sugbo niadtong 2007?
Epektibo ning tubaga. Kay gawas nga di na siya kinahanglang mopasabot sa daghang depekto (nga hagbay rang nahibaw-an) ug sa dakong alkanse sa CICC (nga karon lang bag-o natino), mahilom ang mga nagpakisusi sa pasumbingay nga manlipaghong unta sa kauwaw ang mga Sugbuanon kon wa pa niya ipamugos pagtukod ang CICC.
***
May gamay lang problema. Dakong bakak ang pagpatuo nga nauwawan untang Sugbo kon wa pa matukod ang CICC. Kay pila ka semana sa wa pang summit, ang mga tigpasiugda nitakda na sa Shangrila Hotel sa Mactan isip alternatibong venue. Gani, wa mahuman ang CICC sa pagsugod unta sa summit niadtong Disyembre 2006, maayo na lang nga may bagyo ug giuswag sa sunod buwan.
Nauwaw gyud og gamay ang mga tigpasiugda dihang nangabasa sa uwan ang langyawng mga sakop sa media ug ilang kahimanan. Kay buslot ang gidalidali nga atop sa CICC. Maayo na lang nga nituang ang uwan pag-abot sa mga lider sa Asean.
***
Gipatuo sab ni Garcia ang Sugbuanong mga magbubuhis nga ang pagtukod sa world class nga CICC makahimo sa Sugbo nga convention capital sa Pilipinas. Kay anhi na unya himuon ang kalibotanong mga tigom sa nagkalainlaing mga buhatan sa gobyerno ug sa pribadong sektor.
Ang tinuod mao nga ang CICC substandard ug nakadani og mas daghang langaw kay sa mga kumbensiyon. Mas niulbo gyong kasuko sa mga Sugbuanon karong nabisto nga mas dako diay ang gasto sa tubig ug kuryente kay sa kinatibuk-ang kita. Nga nikabat nang alkanse og kapin sa P40 milyones sa niaging upat ka tuig.
***
Tigpaminaw sa Arangkada sa DYAB 1512 nga mas suhito sa mga numero kay sa bag-ong liderato sa Kapitolyo nipasabot sa mas dakong alkanse sa CICC:
“ Kon gipabilin pa sa bangko ang usa ka bilyon ka pesos nga naggasto sa CICC mokita unta og interes nga P50 milyones matag buwan;
“ Makatukod ug maka-aspalto unta og usa ka libo ka kilometro ka kadalanan hangtod sa labing hilit nga kabukiran;
“ Makatukod unta og duha ka libo ka classrooms alang sa mga tinun-an;
“ Makatukod unta og napu ka libo ka disenteng kabalayan alang sa labing kabos nga mga pamilyang Sugbuanon;
“ Makahingpit unta sa tanang district hospitals nga wa nay pasyenteng mamatay tungod sa kakuwang sa tambal ug doktor; ug
“ Di unta mahigot ang Ombudsman sa imbestigasyon sa nangalisbong transaksiyon.
***
Email: leo_lastimosa@abs-cbn.com