Angayng pakpakan ang kaagresibo sa Commission on Elections (Comelec) pagbadlong sa kalapasan sa pipila ka kandidato sa piniliay karong Mayo 13. May mga kandidato pagka senador ug partylist groups nga gihatagan na og notisya sa Comelec sa ilang propaganda materials nga nilapas ang gidak-on o gipapilit sa gidili nga mga dapit.
Gawas nga gidasig sa Comelec ang publiko sa pagtaho sa bisan unsang kalapasan nga ilang nabantayan, gihatagan sab og kahigayonan ang publiko pagpadayag sa ilang mga sentimento batok sa kalapasan sa mga kandidato ginamit ang bag-ong social media. Nahadlok hinuon ko nga di ni paigo.
***
Unang nakadawat sa pasidaan sa Comelec mao si senatorial candidate Sonny Angara, sakop sa Team PNoy, kansang posters mas dako kay sa gitakda sa mga lagda gawas nga gipamutang sa mga dapit gawas sa common poster areas. Matud sa Comelec ikiha nila si Angara kon di moboluntaryo pagtangtang sa iyang posters.
Si Angara nangayo dayon og pasaylo sa Comelec. Ug nipasalig nga ipatangtang sa labing daling panahon ang iyang propaganda materials nga nakalapas sa mga lagda sa kampanya. Wa pay notisya ang Comelec kon gitinuod ba gyud ni Angara pagkurihir ang nasakpan niya nga kalapasan.
***
Sunod nga gipasidan-an sa Comelec mao silang senatorial candidates Risa Hontiveros (Team PNoy), Edward Hagedorn ug Teddy Casiño (mga independente) ug pipila ka partylist groups. Ang ilegal nga campaign materials ni Hontiveros nasakpan sa Comelec sa Dumaguete City sa Negros Oriental. Samtang ang kang Hagedorn nakit-an sa Manila.
Si Hontiveros nipahibawo sa Comelec nga gisusi na sa iyang mga boluntaryo kon nakalapas ba gyud sa mga lagda ang ilang campaign materials sa Dumaguete. Samang pasalig ang giluwatan sa kampo ni Hagedorn. Pipila ka partylist groups nanghunaw sa kalapasan apan nipasalig nga ilang ipatangtang ang ilegal nga posters.
***
Ang kaagresibo sa Comelec nakadasig sa mga botante pagpalambo sa ilang pagtabang pagbantay sa kalapasan sa mga lagda sa piniliay. Makapaabot ta nga mosamot pagbaha sa mosunod nga mga adlaw sa mga buhatan sa Comelec ang mga taho ug mga ebidensiya sa kalapasan gikan sa nagpakabana nga mga botante.
Apan nahadlok ko nga kon kutob ra sa pasidaan ang Comelec, mapawong ang interes ug mobalik ang kakuwang og pagsalig sa katawhan sa katakos ug kaligdong sa Comelec pagsilot sa badlungong mga kandidato. Di paigo ang mga pasidaan. Nga igo lang tubagon og mga pasalig pagtul-id sa kalapasan. Kinahanglan nga duna gyoy mga kaso nga ipasaka ug duna gyoy mga kandidato nga mapahamtangan sa tukmang mga silot. Nga, segun sa balaod, naglakip sa pagtangtang gikan sa listahan sa mga kandidato ug pagkapriso hangtod sa unom ka tuig nga way probation.
***
Email: leo_lastimosa@abs-cbn.com