Wa nay angayng pamatud-an ang gobyerno ug ang kampo ni suspendidong Gobernador Gwen Garcia sa nagpadayon nga panagsungi sa Kapitolyo sa Sugbo: Napamatud-an na sa Malakanyang ang ilang pailob sa pagdumili ni Garcia pagbiya sa iyang buhatan sud na sa tunga sa buwan; ug napamatud-an na ni Garcia nga andam siyang mosukol ni bisan kinsa, bisan ni Presidente Noynoy Aquino pa, pagpanalipod sa iyang katungod batok sa iyang gituohan nga ilegal nga kamandoan pagsuspenso niya.
Human sa paglabay sa taas nga kasaulohan sa Pasko ug bag-ong tuig, wa nay laing kapilian ang gobyerno ug ang kampo ni Garcia: Ang pagpatuman sa balaod bisan kinsay maig-an ug bisan kinsay hingtungdan.
* * *
Ubos sa balaod, si Presidente Aquino may gahom sa pagsuspenso ni Garcia. Nga gipahamtang ni Aquino di tungod kay wa siya ganahi sa panagway ni Garcia. Ni kay nagsingabot nang piniliay sa Mayo karong tuiga. Kon dili tungod sa rekomendasyon ni anhing DILG Secretary Jesse Robredo.
Di kapasanginlan si Robredo nga nihimo sa rekomendasyon kay managsama sila og partido ni Jun-Jun Davide, kaatbang ni Garcia sa niaging piniliay, ug ni Agnes Magpale, nga mohulip sa mabakanteng katungdanan sa pagsuspenso ni Garcia. Kon dili tungod kay nakonbikto si Garcia sa kasong administratiba nga gipasaka ni anhing Bise Gobernador Greg Sanchez kapin sa duha ka tuig nang nilabay.
* * *
Ubos sa balaod, may katungod si Garcia sa pagsukol sa kamandoan ni Aquino pagsuspenso niya. Bisan giisip nang “final and executory” ang kamandoan ni Aquino, makahimo si Garcia pag-awhag sa hukmanan pagdeklarar nga ilegal ang pagsuspenso niya. Kay abtan man og pila ka buwan ang husay sa merito sa iyang petisyon, makahimo siya pagpangayo og temporary restraining order (TRO) gikan sa korte.
Kon moluwat ang korte og TRO, way mahimo ang Malakanyang gawas sa pagpabalik ni Garcia sa katungdanan. Apan 15 ka adlaw na human nipasaka og petisyon si Garcia sa Court of Appeals (CA), wa pay TRO nga naluwatan pabor niya.
* * *
Kon ipatigbabaw ang “rule of law” ug kon tahuron ang “judicial proceedings,” makapabilin lang si Garcia sa Kapitolyo kon makakuha siya og TRO. Di niya maggamit nga depensa ang pagdaog pagka gobernadora sa tulo ka piniliay. Ni ang argumento ni Senate President Juan Ponce Enrile nga ang suspension order ni Garcia maisip rang “presumptively legal” hangtod mohukom ang CA sa legalidad sa kamandoan.
Tinuod nga hukmanan ray makadeklarar legal bang pagsuspenso ni Garcia. Samtang magpaabot sa hukom sa CA, ug dayon sa Korte Suprema, kinahanglang manaog si Garcia sa katungdanan. Kon wa pa makumbinser sa kaapiki sa iyang kahimtang, angayng pahinumdoman si Garcia nga dihang nagpakitabang siya sa mga Sugbuanon pinaagi sa Twitter kay nipasangil nga gilibotan na sa kapolisan ang iyang buhatan, si Mayor Mike Rama ray nitunga.
* * *
Email: leo_lastimosa@abs-cbn.com