Hasta si Cebu Archbishop Emeritus Ricardo Kardinal Vidal tigpaminaw diay ni Marlon Bellita sa programang “Rated R” sa DYAB 1512 khz. Nitug-an si Kardinal Vidal ni Rico Lucena sa TV Patrol Central Visayas nga mingawon na siya sa mga pasiaw matag hapon human nitaliwan si Marlon.
Daghang pari ug madre ang tigpaminaw sab ni Marlon. Kasagaran nila nganlan ug sangpiton gyod gani ni Marlon sa iyang tulomanon. Apan kasagaran nagtukiki lang sa hilom. Kay, sama ni Kardinal Vidal, wa kahigayon ni kakita og panginahanglan sa pagpahibawo ni Marlon nga mga suki sab sila sa “Rated R.”
***
Ambot may nakahunghong bang Marlon nga naminaw diay sa iyang mga pasiaw ang usa sa labing malungtaron nga prinsipe sa Simbahang Katoliko sa nasud. Kaanugon kun namatay si Marlon nga wa kahibawo nga nagsunod niya silang Kardinal Vidal ug ubang inila ug gamhanan nga mga personalidad sa gobyerno ug pribadong sektor.
Sa pikas nga bahin, niingon ang pipila nga maayo ra sab. Nangomedya sila nga kun nahibawo pa si Marlon nga naminaw niya ang kardinal mahimong nanagana pagsibya sa iyang labing gilok nga mga komedya, nga maoy gikahimut-an sa kasagaran sa mga tigpaminaw, apil nang pipila ka pari ug madre.
***
Atol sa unang gabii sa haya ni Marlon sa St. Peter Memorial Chapel, nitapad ko paglingkod sa mga madre samtang naminaw sa pakigpung ni Cebu Provincial Board Member Julian Daan, usa sa labing suod ni Marlon. Nihunghong ang mga madre nako nga ganahan sila bisan sa gilok nga mga komedya ni Marlon kay way malisya.
Apan wa silang kaagwanta dihang gisubli ni Daan ang iyang komedya nga, “Mas maayo pa si anhing Ernie Baron kay dunay lagay ng panahon, ako intawon dunay lagay apan tungod sa politika wa nay panahon.” Labing hamtong nila nibuyag, “Hoy, duna baya’y mga madre dinhi.”
***
Gawas sa 26 niya ka lainlaing tingog, ang laing bentaha ni Marlon sa ubang mga komedyante sa Sugbo mao ang iyang hingpit nga determinasyon sa pagkat-on, pagsuhito ug pagpalambo sa arte ug kasaysayan sa komedya. Bisan, o tungod ba kaha, sa talagsaon niyang popularidad, si Marlon wa mohunong pagkat-on sa bag-ong mga paagi sa pasiaw ug pagmugna ug pagpangandam sa bag-o niyang mga materyal.
Nakapasamot sa kamakahuloganon sa tampo ni Marlon mao nga nahimo niya kadtong tanan bisan sa kalabad sa iyang ulo, sa kagil-as sa iyang paminaw ug kabalaka sa iyang kahimsog tungod sa taas nga presyon sa iyang dugo. Nga nahibawo siyang di niya mabadlong tungod sa kamahigugmaon sa pagkaon ug pag-inom ug pagtukaw uban sa suod nga mga higala ug sa kalimtanon pagtomar sa iyang tambal.
***
Email: leo_lastimosa@abs-cbn.com