Gula 6
Mihinay pagbangon si Raffy gikan sa iyang gihigdaan. Gisudlay usa niya ang iyang buhok ug hinay nga mipaingon sa kusina. “Maayong buntag nang Ason… may bisita ka man diay nang,” matud ni Raffy.
“Uy nagmata ka na diay dong. Dia sayo kaayo nga mianhi si Melody kay nagpakisayod nganong miabot ka dinhi sa among dapit,” dali nga tubag ni nang Ason, samtang nagpahiyom nga mitan-aw ni Raffy si Melody.
“Good morning Melody,” timbaya ni Raffy sa dalaga. Gipaanhi ko ni Tatay kay basin gusto ka kuno nga mokaon og botong para lamawon kay kuhaan ka niya. Adto ta sa balay Raff,” ni Melody pa nga mapahiyumon kaayo.
Miyango-yango si Raffy nga nagpasabot nga gidawat niya ang pagdapit ni Melody. “Didto na lang ta mag-breakfast kay nag-ihaw og manok-bisaya si Mama kay giisip ka man niya nga bisita dinhi sa among lugar,” dugang ni Melody.
“Human ninyo og pamahaw dong, mahimong mangaligo mo sa tubod nga dili layo sa balay nila ni Melody. Ayaw lang mo pagkiat didto kay taw-an ra ba kuno kanang linaw diha,” matud ni nang Ason.
Tuod, nagkuyog sila si Melody ug Raffy. Kasarangan lang ang balay nila ni Melody apan dili usab tanto nga gamay. “Maayong adlaw nong, ako si Raffy,” giingnan ni Raffy ang amahan ni Melody sa pagtangka pa lang nila sa atubangan sa balay.
“Nakaila na ako kanimo dong kay didto baya ko gabii sa kapilya ug naminaw sa imong pagkanta. Pareho ta og hilig dong Raffy, kinaham usab nako ang mga kanta ni Eddie Peregrina,” matud sa amahan ni Melody.
Nagkasuod pa gayud sila si Melody ug Raffy. Human sila mangaon, nanuroy sila sa giingon ni nang Ason nga tubod diin adunay gamay’ng linaw nga mahimong makaligoan.
“Kaligo na Raff dia man ko’y gidala nga short pants para nimo,” giagda ni Melody si Raffy. Nakapahiyom si Raffy kay daw madanihon kaayo ang gamay’ng linaw. “Maligo ko basta maligo ka ‘sab Mel,” ni Raffy pa.
Nangaligo silang duha. Misamot ang ilang kasuod. Naglumbaanay sila og langoy ug may mga higayon nga magunitan ni Raffy ang kamot sa dalaga. Wala makasabut si Raffy sa pagbati nga kalit miturok sa iyang kasing-kasing.
Gitutokan ni Raffy si Melody. “May boyfriend ka na ba Melody?” Daw nasud-ipan si Melody kay wala siya magtuo nga mangutana si Raffy niini ngadto kaniya.
Igo lang milingo-lingo si Melody. “Wala ko makasabut sa akong gibati karon Melody. Kanindot kaha kun ikaw ang mahimo ko nga girlfriend,” gihinay paggunit ni Raffy ang kamot sa dalaga. (Sumpayan)