Mamugnaong taming: Ang Saad nga Dili Malugtas

CEBU, Philippines - Milukop na ang kangitngit. Nangandam na si Margie. Humana sila og chat sa iyahang trato nga si Glen nga tua sa Canada. Paingon na sa trabaho si Glen ug nananghid na usab si Margie nga matulog na. Apan, namakak lamang kini.

Sukwahi sa gituohan ni Glen, makigkita si Margie kang Bruce karong gabhiuna. Sulod sa pipila na ka gabii, pirmi mag-abot ang duruha sa ilawom sa kahoy nga sambag nga mao ang nahimo nilang meeting place sukad pa niadtong una nilang panagkita. Sa baylehan sa barangay nagkaila-ila ang duha.

Una nga nagkaila si Bruce ug si Margie. Sukad sa ilang unang paghimamat, nagpakita na og motibo si Bruce nga may gusto kini sa dalaga. Wala usab ilimod ni Margie nga may purohan si Bruce kung mangulitawo. Gani, human sa pipila ka adlaw sa pagtext-text kay nagkauyab gayud sila.

Apan, niabot si Glen sa kinabuhi sa managhigugmaay. Wala masayod si Bruce nga nagpauyab pa si Margie bisan kun may trato na kini. Bisan kun maayo ang dagan sa ilahang relasyon, gisugot sa dalaga si Glen sa dili matataw nga rason. Gibuwagan gilayon niya si Bruce.

Nasakitan pag-ayo ang ulitawo sa mga panghitabo apan wala siya’y nahimo. Gidawat na lamang niya kini, sa tabang usab sa pipila ka mga suod nga higala.

Bisan pa og may bag-o na kining relasyon, nagsige gihapon og contact si Margie kang Bruce. Katwiran  niya, dili siya ganahan nga mawala sa iyahang kinabuhi ang usa ka mahinungdanong higala. Dugang pa niya, wala pa siya nasayod sa sangputanan sa maong relasyon ug lagmit nga dili kini magdugay.

Lagi kay martyr sa gugma, bisan sakit nisugot si Bruce. Gani, nisaad pa kini nga andam kini magpaabot kun ugaling magkinahanglan kaniya ang hinigugma.

Nilabay ang pipila ka semana, nakahukom si Bruce nga mopalayo kadali. Mao usab kini ang tambag kaniya sa mga higala. Mas dali niya makalimtan ang dalaga ug ang kasakit nga gihatag niini kung may distansya tali kanila. Gipaninguha usab niya nga maputol ilahang kumunikasyon pinaagi sa pag-ilis og numero sa iyahang telepono.

Ang wala nasayuri sa uban kay may plano pa gihapon kining pamatud-an iyahang saad nga magpaabot sa dalaga kung kanus-a kini mahigugma balik kaniya.

Tuod man, may maayong sangputanan ang pagpaabot ni Bruce. Niabot gayud ang panahon nga nag-inusara sa kamingaw si Margie. Dala usab nga nakalarga na si Glen paingon sa Canada. Iyaha kining gihupay ug didto nagsugod ang ikaduhang yugto sa ilahang relasyon. Apan, lahi na ilahang setup karon.

Bisan pa kung una siyang niabot sa kinabuhi ni Margie ug una silang nagkauyab, karon siya na ang nahimong kabit. Ug dili sab gustong buwagan sa dalaga ang trato nga nanimpad sa gawas.

Sa mga gabiing nanglabay, nagpadayon ang salaod nga gugma sa duruha. Ang punoan sa sambag ang bugtong saksi sa pagluib ni Margie sa iyahang karelasyon.

Apan sa dili matino nga hinungdan, wala na ang ka-bibo ni Bruce. Wala masayod si Margie kung unsa ang nahimong epekto sa kapakyas sa gugma ngadto sa ulitawo apan dili na kini motingog. Igo na lamang kini sa pagtando ug pagpahiyom.

Nipaingon na si Margie sa ilahang gikasabutang lugar. Sa gihapon, dili siya gusto nga may makakita kaniya. Busa naglakaw na lamang siya paingon sa punoan sa sambag. Didto nagpaabot na kaniya si Bruce nga hayag ang panagway. Nalipay ang dalaga kay maora og malipayon kini.

“Ganiha ra ka?”, patimbaya niya. Apan, imbis motubag, nipahiyom lamang kini.

Nagtupad sila og lingkod sa dakong bato duol sa pampang. Sa taas, nagpungasi sa dagko nga bunga ang puno-an sa sambag. Ang kahayag sa takdol nga bulan ang nisuga kanila, samtang nagkidlap-kidlap usab ang mga bituon. Nindot kaayo ang panahon.

Kalit nga nihaguros ang bugnaw nga hangin. Nakabati og katugnaw si Margie, busa gigakos siya ni Bruce. Tingog sa cellphone ang nibuak sa maong panan-awon. May nitext kaniya.

“Ako una ni basahon og kinsa’y ni text”, pananghid niya samtang nibuhi kadali sa hugot nga paggakos.

“Asa na ka? Dili ka mokuyog namo? Mangluod gyud to si Bruce nimo” ang sulod sa text message.

Nipasiplat siya ni Bruce. Wala siya masayod kun unsa ang buot ipasabot sa iyahang ig-agaw. Nahadlok siya kun may gisultian ba si Bruce mahitungod sa ilahang sekreto nga panag-abot. Ni-reply siya. Nangutana sa buot ipasabot sa text message.

Ni-ring iyahang telepono timaan nga may nitawag kaniya. Nitindog siya kilid sa bato aron sa pagtubag sa tawag.

“Wala diay ka nasayod?”, sukot sa iyahang ig-agaw nga si Dina. “Karon ma-abot ang patay’ng lawas ni Bruce.”

“Ayaw gud ko og binuangi.” Nalukop sa tumang kahadlok si Margie. Wala siya masayod kung unsa na ang mga nahitabo. Wala siya masayod kung unsa ang dapat niya tuohan.

“Naghikog siya niadtong miaging semana. Nagpusil sa iyahang ulo. Sumaa sa iyahang suicide note, dili pa jud daw gihapon ka niya makalimtan. Di lang daw ka pahibaw-on una kay nisaad daw siya nga magpa-abot siya nimo. Karon niabot iyahang patay’ng lawas gikan sa Agusan. Basin ganahan ka mobilar...” Gidala sa mabugnaw nga hangin ang mga pulong sa iyang ig-agaw.

Nilingi si Margie ug nakita niya si Bruce nga may dugo. Paingon kini kaniya. Didto lang nabantayan ni Margie nga luspad kaayo kini ug may dugo sa ulo. Apan nipahiyom gihapon kini kaniya.

Niatras siya apan wala na siya’y namatakan nga yuta. Inanay siyang nahulog sa pampang ug bugtong ang pagsinggit lamang iyahang nahimo. Adto niya nahinumduman ang saad ni Bruce kaniya: “Andam ko magpaabot kanimo. Bisan sa laing kinabuhi.”

KATAPUSAN. Dibuho ni Ramon Taguchi (FREEMAN)