Cebu South Bus Terminal. Liko sa wala. Lapas sa CCMC. Unahan pas Riverside. Subay sa South Expressway alyas Natalio Bacalso Avenue. Salamat kay nalunod sa kasaba sa makina sa trak ang kagahob sa way nadang daygon sa rugby boys.
* * *
Bayanihan Village. Saint Jude Bulacao. Flyover sa Talisay. May pagkipatkipat pang miluta sa natun-ugan kong utok. Bisan asa molingi ang dayandayan sa Pasko maoy gigastoan kaysa mohinabang sa nag-ilaid tang kaigsoonan sa Cateel.
* * *
SRP Talisay Access Road. Tungkil. Poblacion. Springwoods. Boundary Naga-Minglanilla. May nangurikuri sa kampanaryo daw batobalani nga mihigop sa mangtambongay og Misa sa Kaadlawon bisan kini wala madayag diha sa Bibliya. Mabasol ba nimo kon ang ubang gimuta padayong magduka? Magtsismis pagpapas sa mika?
* * *
Naalad. Taghaguimit. Uling. Apid. Menor likay sa nadisgrasyahang kurbada. Unahan - eskina sa Lutopan. Gihangop ko ang kakamig alas kwatro sa kaadlawon diin nanganawkanaw ang Ebanghelyo ni San Juan. Hingpit nang gidakop sa kalaay ki'ng mga tuhod nga puypoy nang daang makigsaulog sinambogan sa ritwal sa pagano.
(Illustration by Ramon Taguchi)