CEBU, Philippines — Moabot lang ngadto sa 1, 677 ang nagparehistro sa tibook probinsya sa Sugbo sa unang adlaw sa pagbukas sa registration period niadtong Lunes, Nobiyembre 6 base sa record nga natala sa Provincial Comelec. Apil sa registration, mao ang bag-ong botante, correction sa mga entries sa mga botante ug reactivation, walay labot niini ang pag- transfer sa registration.
Sa maong datus, 791 sa mga nagparehistro mga lalaki, 876 ang babaye, apil na niini ang dakbayan sa Sugbo, Mandaue ug Lapu-Lapu.
Sa kapin 50 ka mga lungsod ug dakbayan, ang lungsod sa Catmon, Santander ug Pilar way nagparehistro. Pinakadaghan sa nagparehistro mao ang sa mga dakbayan kon diin ang Cebu City South district ang nag-una nga miabot ngadto sa 267, gisundan sa Cebu City North district nga 204.
Sunod sa pinakadaghan nga nagparehistro mao ang dakbayan sa Mandaue nga 151; Naga 128; Lapu-Lapu 103; Talisay 90; Toledo 73 ug dakbayan sa Carcar nga 62.
Matud ni Atty. Ferdinand Gujilde ang provincial election officer agresibo sila sa satellite registration kaniadto maong nahurot-hurot na ang nagparehistro, wa say transfer of registration silang gidawat, ug possible usab nga wala nagparehistro kay nagtuong di na usab mahinayon ang eleksyon.
Ang barangay ug Sangguniang Kabataan elections giuswag gikan bulan sa Oktubre karong tuiga ngadto na sa bulan sa Mayo 2018.
Ang registration period alang sa sunod tuig nga piniliay nagsugod kini niadtong Nobiyembre 6 ug molungtad sa Nobiyembre 30, 2017. (BANAT NEWS)