CEBU, Philippines - Nipahimangno si Lapu-Lapu City Mayor Paz Radaza sa mga barangay nga palig-unon ang pag-implementar sa alas 10 nga curfew sa mga menor de edad.
Plano ni Radaza nga mo-isyu og memorandum sa Association of Barangay Councils ug sa mga barangay kapitan alang sa pag-review sa ordinansa.
Kini human niya namatikdi nga gigamit ang mga bata sa krimen.
Si Jose Dungog, kapitan sa Barangay Gun-ob ug kasamtangang presidente sa ABC, nitataw nga dunay ordinansa ang matag barangay sa pagpatuman sa curfew sa mga menor de edad.
Siya nipadayag nga ila kining sundon aron dili mahilambigit sa krimen ang kabatan-onan. Sulod sa 30 ka barangay sa siyudad, ang Barangay Pajo ug Basak ang nailhan ni Radaza nga niimplementar sa ordinansa.
Ang ordinansa giaprobahan niadtong 2009 ubos sa administrasyon ni kanhi mayor ug kongresista Arturo Radaza diin si Konsehal Efren Herrera ug Alexander Gestopa ang nangamahan niini.
Sigun sa ordinansa nga gidili ang mga bata nga nag-edad og 18-anyos paubos nga maglakaw sa pangpublikong lugar sama sa plaza, wharf, merkado, sa dagat, diskohan o videoke-han gikan sa alas 11 sa gabii hangtud sa alas 5 sa kadlawon.
Ang pamahayag ni Mayor Radaza naggikan ni incoming President Rodrigo Duterte kinsa nagplano sa pagpatuman sa curfew lukop nasud.
Kung masakpan nga dunay mga bata nga magsuroy sa gihisgutang oras ila kining dakpon ug i-turnover sa City Social Welfare Services o iuli sa ilang mga ginikanan.
Sa laing bahin, si Police Senior Superintendent Arnel Amor Libed, hepe sa Lapu-Lapu City Police Office, pabor sa pagpatuman sa alas 10 sa gabii nga curfew sa mga bata ug daku kining tabang sa kapolisan.
“Malaking tulong sa police kung magtutulungan with barangay. Mababawasan ang street crime at mas ligtas na nasa bahay ang mga medor de edad lalo na sa gabi,” matud ni Libed sa Banat News.
Dugang ni Libed nga mahimo kini nilang matuki tali sa barangay pinaagi sa ilang binuwan nga City Peace and Order Council. (BANAT NEWS)