CAVITE, Philippines – Napaslang ang 47-anyos na taxi driver matapos itong pagtulungang saksakin ng mag-ama sa inuman sa Sitio Silangan Longos, Brgy Zapote 5 sa Bacoor City , Cavite kamakalawa ng hapon. Kinilala ng pulisya ang biktima na si Salvador Alabastro habang nadakip naman ang isa sa dalawang suspek na si Sherlino Gregorio, 56. Samantala, tinutugis naman ng pulisya ang anak nitong si Gilbert Gregorio, 28, kapwa nakatira sa #72 Sitio Silangan Longos sa nabanggit na barangay. Sa imbestigasyon ni PO3 Angelito Roxas, naganap ang pananaksak matapos mapikon ang matandang Gregorio sa biktima habang nakikipag-inuman. Dito na sinugod ni Gilbert ang biktimang nakikipagtalo sa matandang Gregorio kung saan pinasabay na ring sumaksak ang matandang Gregorio.