TUGUEGARAO CITY, Philippines – Kamatayan ang sumalubong sa mag-utol na babae habang tatlong iba pa ang malubhang nasugatan matapos tamaan ng matalim na kidlat sa baybaying dagat sa bayan ng Sto. Tomas, La Union kamakalawa. Kinilala ang magkapatid na sina Jona Lagao, 21; at Jessica Lagao, 19, kapwa nakatira sa Barangay Baybay sa nabanggit na bayan. Naisugod naman sa Union Medical Center sa bayan ng Agoo ang mga sugatang sina Marvin Cacayuran, 19; Vincent Cacayuran, 19; at si Edward Estacio, 15. Ayon kay PO2 Henry Garcia, lulan ng bangka ang mga biktimang mangingisda nang tamaan ng kidlat. Napag-alamang tumilapon ang mga biktima sa lakas ng kidlat at agad na namatay ang magkapatid.