MANILA, Philippines - Bumulagta ang tatlong kalalakihan habang limang iba pa ang nasugatan matapos sumiklab ang rambulan ng magkalabang grupo sa disco bar sa Barangay Bao Alamada, Cotabato City, kamakalawa ng gabi.
Kabilang sa mga nasawi ay sina Agaton Bernabe, Romeo Francisco Egan at si Richard Demetrio.
Samantala, isinugod naman sa ospital ang mga sugatang sina Julie Corbena, Jeje Egan, Bernard Macario, Arnold Egan at si Ali Bernabe.
Sa imbestigasyon ng pulisya, lumalabas na muling nagkrus ang landas ng magkalabang grupo ni Romeo Egan at Agaton Bernabe sa disco bar sa Sitio Kabuluan sa nabanggit na barangay.
Dito na nagkabunutan ng baril at patalim ang magkabilang grupo kung saan umalingawngaw ang sunud-sunod na putok ng baril at nagsaksakan habang nagpanakbuhan naman sa matinding takot ang mga dumalo.
Nahinto lamang ang kaguluhan matapos na rumesponde ang mga barangay tanod at pulisya kung saan patuloy naman ang imbestigasyon.